Israel-Hamas war: Gaza-a damdawi in pui berin hna thawk thei lo : WHO

World Health Organisation (WHO) chuan Israel leh Hamas te indona avangin Gaza City-a damdawi in lian ber, Al-Shifa damdawi in chuan electricty a neih tawh loh avangin a function thei tawh lo tih a sawi.

Gaza Strip-a hospital 26 zinga 20 chu fuel an tlakchham tawh avangin an function thei tawh lo niin UN humanitarian agency chuan a sawi bawk.

WHO hotu, Tedros Adhanom Ghebreyesus chuan, Al-Shifa damdawi in chu hun eng emaw chen an biakpawh theih loh hnuah an be leh thei tih a sawi a, mahse, ni thum chhung electricity leh tui supply an dawn tawh loh avangin, hospital angin a function thei tawh rih lo a ni, a ti.

Gaza Strip-a rorel lai, Hamas hnuaia health ministry chuan damdawi inah hian mi 2,300 vel an awm mek tih a sawi a, fuel an neih loh avangin damlote pawh enkawl theih an ni tawh lo a, nau piang thar 36-te pawh enkawlna ṭha pek an nih thuai loh chuan an dam khawchhuah loh a hlauhthawnawm niin a sawi.

Hetih lai hian Israel chuan Hamas firfiakte hian Al-Shifa damdawi inah command centre an nei tih an sawi a, Hamas nena an inbeihnaah damdawi in hi an kap fuh tel lo tih an sawi bawk. Israel president Isaac Herzog chuan Al-Shifa hospital-in electricity an nei tawh lo nia sawi chu an pawm lo tih sawiin, electricity a awm a, engkim dan pangngai angin an thawk thei niin a sawi thung.

Israel sipai thupuangtu, rear admiral Daniel Hagari chuan Al-Shifa-a nausen awmte hruai chhuahna kawngah Israel chuan a pui dawn tih a sawi.

Ram hrang hrangte'n inkahhai puang turin an nawr zel a, heng zingah hian Israel ram ṭhian ṭhate pawh an tel tawh. Hetih lai hian Israel President chuan ram dangte ngenna pawh an ngaithla reng tih a sawi a, mahse, a hmasa leh pawimawh ber chu an ram leh mipuite venhim chu a ni tih a sawi. Gaza-ah civil mi thi pawh an awm tih a hria tih sawiin, civil mite tawrhna thlengah Hamas chu a mawhphurtu an ni, a ti.