Iran-in Israel Army firfiak pawla puang turin Muslim ramte a ngen

Iran president Ebrahim Raisi chuan Israel sipaite chu Gaza Strip an beih avangin firfiak pawla puang turin Islam sorkarte a ngen.

"Islam sorkarte hian Gaza Strip awptute leh beitu sipaite hi firfiak pawl 'terrorist organization'-ah a puang tur a ni," tiin Raisi chuan Inrinni liam taa Saudi khawpui Riyadh-a Arab leh Muslim summit neihnaah a sawi.

Hun eng emaw chen an inkara inhriatthiam lohna a awm hnuah, kumin March thla khan Iran leh Saudi Arabia hian inlaichinna siam ṭha leh turin an inrem leh chauh a ni. Inremna an siam leh hnuah Raisi-a'n Saudi a tlawhna hmasa ber a ni bawk.

Iran President chuan Muslim ram hrang hrangte chu Israel nena an inzawmna chhu chat a, Palestinian an thlawpna nasa zawka lantir turin a ngen. "Zionist regime- nena inthlunzawmna eng chi pawh chhut chah chu Islam ramte tih tur pawimawh tak a ni," tiin, a bik takin energy field lama an thawhpuina tihtawp chu ngaih pawimawh hmasaka neih tur a nih thu a sawi.

Hamas firfiak pawl thlawptu, Iran President chuan United States chu Israel a thlawp avang leh sum leh pai leh ralthuama a ṭanpui avangin a dem thu a sawi bawk. "Zionist regime indona ralthuam hman leh an fuel-te hi American ho ta vek a ni," tia sawiin, US sorkar chu Israel leh Hamas indonaa a mawhphurtu berah a puh.