Juda-te tihduhdahna duh lohna lantirin France-ah mi nuai chuangin kawng an zawh

France ramah Pathianni khan Juda-te tihduhdah duh lohna (anti-Semitism) lantirna kawngzawh huaihawt a ni a, mi 1,80,000 zet an tel.

France Interior Minister chuan October 7-a Israel leh Hamas inkara indona a chhuah aṭanga kar liam ta Inrinni thleng khan hmun hrang hrangah Juda-te tihduhdahna ṭum 1,247 lai a thleng tawh tih a sawi. Hei hi kum 2022 chhunga Juda-te tihduhdahna thleng chhinchhiah aiin a let thumin a tam zawk hial.

Prime minister Elisabeth Borne, President hlui Nicolas Sarkozy leh Francois Holland-te chu venhimna khauh tak hnuaiah, France khawpuia kawngzawhah hian an tel ve a ni.

President Macron erawh chu kawngzawhah hian a tel lo a, mahse, kawngzawh chu a thlawp thu leh, an ram mite chu Juda-te tihduhdahna rapthlak tak dodal zel turin a sawm.

Police-te chuan, France khawpui Paris-a kawngzawhah hian mi 1,05,000 tel angin an chhinchhiah a, interior ministry chuan rampuma kawngzawh hi mi 1,82,000 angin an chhut thung. Kawngzawh hi ram chhung hmun 70 laiah huaihawt niin, khawpui lian Lyon, Nice leh Strasbourg-ahte pawh neih a ni bawk.

"Vawiina kan thil tum ber chu Juda-te tihduhdahna a tawp thlenga dodal a ni, kan rilru puthmang nen pawh a inkalh talt a ni," tiin Senate Speaker Gerard Larcher chuan a sawi. Pathiannia kawngzawhah hian buaina lian tham chhuak a awm lo.