Barack Obama'n Cuba a tlawh

US President Barack Obama chu ni thum chamin Pathianni khan Cuba ramah a zin a, kum 88 chhunga US President zinga Cuba ram tlawh hmasa ber a ni.

President Obama hi a nupui leh a fate pahnihin an zui a, Cuba ram an thlen hnu hian an ram khawpui, Havana chu kein an fang nghal a ni.

Obama-te chhungin Cuba an thlen hian ruah a sur nasa a, airport-ah hian official-ten an lo hmuak a, Cuba President Raul Castro erawh a lang ve lo. Raul Castor hian an ram tlawhtu ram hruaitu langsar deuhte chu Jose Marti International Airport-ah hian a lo hmuak ṭhin a, mahse US President erawh hi chu lo hmuak loin nimin khan a pualin Palace of the Revolution-ah lawmna hun a buatsaihsak zawk a ni.

Cuba leh US inkar boruak hi kum 1959-a Cuba President hlui, Fidel Castro-a kaihhruaia communist revolution a thlen hnu khan a chhe ṭan a, US sorkar hian Castro hi a thuneihna atanga paihthlak a tum a ni. US President hlui John F Kennedy khan km 1962-ah sumdawnna lama Cuba ram hrekna hi a siam. Hemi kum vek hian Soviet Union aṭangin Cuba-ah hian nuclear missile lakluh a ni a, he thil hian Cuba leh America ram inkar boruak a tichhe zual a ni.

Mahse kum 2014
aṭang khan ram pahnihte hian an inkar boruak ṭha lote siam ṭhat tumin hma an la ṭan a, palai pawh an intir tawn leh tawh a ni. US pawhin Cuba ram a hrekna ṭhenkhatte a hlip tawh a, telecommunication deal pawh an siam tawh bawk. Mahse Cuba rama bungrua thawnluh kawnga hrekna a siam erawh a la hmang chhunzawm zel.