UN-in NKorea a dem

United Nations Security Council chuan North Korea-in ballistic missile a enchhin leh chu a dem thu a sawi a, hei hi UNSC resolution palzutna a ni, a ti.

Kar hnih liamtaah khan UNSC hian nuclear test vang hian NOrth Korea hrekna a siam belh a, mahse hrekna siam a nih hnu, kar kaltaah khan NKorea hian ballistic missile pahnih a kapchhuak leh a ni.

UNSC-in NKorea demna thuchhuah a siam hi NKorea ram ṭhianṭha, China pawhin a thlawp a, NKorea chu UN resolution palzut zawnga thil ti tawh lo turin a ngen.

US official-te chuan kar kalta khan NKorea hian medium-range missile pahnih a kapchhuak niin an sawi. UN-a US palai, Samantha Power chuan NKorea-in a missile a kahchhuah leh hian ram ram hrekna na zawk siam a ṭulzia a tilang chiang hle a ni, a ti. Japan pawhin NKorea thiltih chu a dem thu sawiin, UNSC thuchah hi a la man thiam tawk lo a ni, a ti.

UN Secretary General, Ban Ki-moon chuan missile pahnih kahchhuah a ni leh chu thil ṭha lo tak a ni tiin, NKorea sorkar chuan rama tana nghawng ṭha lo tak nei tur thil ti tawh lo turin a ngen.

North Korea-in kum 2006-a atomic device a enchhin hmasak ber aṭangin UN chuan hrekna ṭum nga a lo siam tawh a ni.