Doha-ah World media summit hmang

Qatar khawpui, Doha-ah Pathianni aṭang khan World Media Summit (WMS) 2016 neih a ni a, ram 100 aṭangin media palai 350 chuang an tel.

Ni hnih awh summit hi Qatar-a hmunpui nei, Al Jazeera buatsaih a ni a, summit thupui atan 'The Future of News and News Organizations' tih hman a ni.

Summit ṭan hma hian khawvela news organization lian zual 10 - Xinhua News Agency, CNN, Reuters, The Associated Press, International Information Agency "Rossiya Segodnya," Al Jazeera Media Network, TASS Russian News Agency, Kyodo News, MIH Grouo, leh The Hindu Group-te chuan presidium meeting an nei bawk.

Media summit-ah hian news reporting chungchangah technology in nghawng a neih dan hrang hrangte sawiho a ni a, hei bakah hian journalist-te venhimna pek dan te, media business model siam thar dan chungchangte an sawiho.

WMS hi kum 2009 aṭang kha a vawikhatna turin Beijing-a Great Hall of the People-ah neih a ni a, a ṭum hnihna chu kum 2012, July 5 khan Moscow-ah neih leh a ni.