Ethiopian Israel-ten kawng an zawh

Ethiopian Israel-te chuan Israel sorkarin Ethiopia rama an chhungte an pemluh ve a phalsak loh avangin lungawi loin Pathianni khan Jerusalem-ah kawng an zawh.

Police leh organiser-te chuan khawngzawh hi mi 2,000 vel niin an sawi a, Prime Minister Benjamin Netanyahu-a office kawtah kawngzawh hi an titawp a ni.

Mipui pungkhawm chuan Israel sorkar thiltih danah inthliarna nasa tak a awm nia sawiin, Ethiopia rama an chhungte an kalsan takte chu Israel ramah an luh ve phalsak an phut thu an sawi.

Israel ramah hian Ethiopian Juda hi mi 135,00 vel an awm tawh a ni. Kum 1984 leh 1991 inkarah khan Israel sorkar chuan Law of Return hnuaia Juda mi zawng zawngte khua leh tui nihna pek hmangin Ethiopia Juda mi tam tak chu an ramah hian a hruai lut a ni. Mahse he dan Ethiopian Juda thlah, Falash Mura hnam, kum zabi 18 leh 19 laia Kristiana inlette chu a huam tel lo thung.

Kum 2015, November thla khan Israel sorkar chuan Falash Mura hnam mi 9,100 te an rama an pemluh a phalsak a, mahse kumin March 7 khan Prime Minister office chuan sum lam indaih lohna avangin parliament member-te thu lo pass tawh hi a taka kalpui theih a ni dawn lo tih a sawi a ni.

Pathiannia kawngzawh huaihawttu zing-ah hian MP Avarham Neguise pawh a tel a, a ni hi Ethiopia ram aṭanga pem lut niin PM party, Likud party member a ni.