Israel-Hamas war : Hamas-te'n inkahhai puan chuan an mi man 70 chhuah remti

Palestinian firfiak pawl, Hamas chuan Israel nen an inkara palai hna thawktu, Qatar palaite hnenah Israel-in ni nga chhung inkahhai puan a remtih chuan, Gaza Strip-a an mi hren mek zinga mi 70, hmeichhia leh naupangte chu chhuah an remti dawn tih an sawi.

Hamas armed wing, Alqassam Brigades thupuangtu, Abu Ubaida chuan an pawl Telegram channel-ah audio record hi dahin, 'Inremna kan siamah chuan ni nga chhung inkahhai puan a, Gaza Strip hmun hrang hrangah chhawmdawlna petute luh phalsakna a tel tur a ni," a ti. Hamas te rawtna siam chungchangah Israel lam chuan thuchhuah an la nei lo. October 7-a Hamas firfiakte'n Israel chhim lam an beihnaah khan mi sang chuang an thah bakah, mi 240 vel an man niin Israel lam chuan an sawi a ni.

IDF-te'n damdawi ina Hamas-te ralthuam dahna hmun hmu chhuak

Israel Defence Force (IDF) chuan Thawhṭanni khan Gaza Strip-a naupang damdawi in pakhat hnuaia Hamas firfiakte ralthuam dah khawlna hmun an hmu chhuak tih sawiin, he hmun video leh thlalakte an pho chhuak. He hmun hi Hamas-te'n an mi mante an lo hrenna hmun nia a lan thu an sawi bawk.

Israel sipai thupuangtu, rear admiral Daniel Hagari chuan naupang damdawi in, Rantissi Hospital basement-a Hamas-te ralthuam chhekna hmun an hmuh chhuahah hian grenade, suicide vest leh puak thei thil dangte hmuh a ni tih a sawi. Hagari hian a bul hnai tunnel aṭang chuan Hamas naval commander chenna in a kalpawh theih thu a sawi bawk a ni. Heng bakah hian Israel sipaite chuan thirsakawr, silai kahna hnuhma awmna pawh an hmu a, hei hi Hamas-te'n Israel an beih ṭuma an mi mante Gaza Strip lama hruaina atana an hman nia a lan thu an tarlang

Gaza City hospital gate bulah Israel tank inchhawp tawh

Gaza City-a damdawi in lian ber, Al Shifa hospital gate bulah Israel tank-te chhawp a ni tawh.

Hamas rorelna hnuaia health ministry chuan damdawi in chhungah hian damlo 650 vel an la awm niin a sawi a, medical facility dangah sawn chhuah an duh tih a tarlang bawk. Israel chuan he damdawi in hnuaiah hian tunnel awmin, Hamas firfiakte headquarters a awm a, damdawi ina damlo te chu firfiakte hian inphenna atan an hmang niin a sawi thung.

Israel chuan damdawi ina civil mi awmte chu insawn chhuak tur leh, damlote pawh hmun dangah sawn turin thawktute a hrilh. He damdawi ina nausen awmte pawh hmun danga sawn chhuah an nih theihna tura puih a tum a, emergency atana hman turin damdawi in luhnaah hian fuel litre 300 an dah bawk thu an sawi. Mahse rawtna siamte hi Hamas lam chuan an lo hnawl niin an sawi a ni.