China leh Pakistan Navy-te'n drill an nei

China leh Pakistan navy-te chuan Arabian Sea-ah kar khat awh drill an nei. Hemi hma lawk hian Russian Pacific Fleet leh Myanmar ramte chuan maritime exercise an lo nei tawh a, India leh U.S chuan ram venhim kawngah thawh dun an lo intiam tawh bawk.

Karachi-a navy base-ah Inrinni khan China leh Pakistan navy-te chuan Arabian Sea hmar lamah tuipui leh boruakahte exercise hi an nei a, he exercise hian November 17 thleng a awh ang.

People's Liberation Army Daily-in a tarlan danin, exercise neih chhung hian China leh Pakistan-te chuan a vawi khatna atan joint maritime patrol an nei dawn a ni.

Hemi hma lawk hian Russia leh Myanmar chuan November 7-9 chhung khan a ṭum khatna atan Indian Ocean hmar lama Andaman Sea-ah navy exercise an lo nei tawh a, Russia chuan he exercise hi ram tana bung thar pawimawh tak a ni tih sawiin, U.S-in tuipui venhimna lama dinhmun sang tak a neih karah Russia chu a tel ve tih lantirna a nih thu a sawi. He exercise-ah hian anti-submarine pahnih, Admiral Tributs leh Admiral Panteleyev bakah Myanmar lamin indo lawngte an thawh chhuahpui a ni.