Israel-Hamas war : Israel sipaite'n Al-Shifa hospital an luh chilh

Israel sipaite chuan Gaza City-a hospital lian ber, Al-Shifa hospital chu nimin khan an luh chilh a, room leh basement-te an enfiah.

Al-Shifa hospital hi Hamas firfiakte'n bihrukna atan leh, civil mite inphenna atan an hmang niin Israel chuan a lo sawi tawh a, luh chhuah tum hian a hmain hospital gate bulah tank-te pawh a lo chhawp tawh a ni. Nimin khan sipaite hian hospital chhung hi lutin, room tin an enfiah a, mi ṭhenkhatte chu an zawt fiah bawk. Hospital chhungah hian inkahna erawh a thleng lo nia sawi a ni.

Hetih lai hian hospital hian electricity an neih loh avang leh, fuel an tlakchham tawh avangin hospital ang pawhin hna a thawk thei tawh lo nia sawi a ni bawk. Mahse nimin khan Rafah crossing kaltlangin, fuel litre 25,000 chu Gaza-ah hian phurh luh an ni.

Isarel sipaite chuan hospital pawn lamah Hamas-te nen an inkahnaah an sipaite an thi a, firfiakte pawh kah hlum an ni bawk tih an sawi. Israel sipaite hian hospital mamawh damdawi leh hmanruate pawh an supply thu sawiin, an medical team leh Arab ṭawng thiam an sipaite chuan heng supply-te hian a mamawhte hnen a thleng ngei tih an enfiah zui niin an tarlang.

Hamas-te'n hospital hnuaiah command centre an nei : US

US chuan intelligence lam aṭangin, Palestinian firfiak pawl Hamas-te chuan Gaza City-a Al-Shifa hospital hnuaiah command centre an nei tih an hriat tih a sawi.

National security thupuangtu, John Kirby chuan Hamas-te hian he centre-ah hian ralthuamte chhek khawlin, Israel bei turin an inbuatsaih ta ni, a ti.

Israel chuan a hmain Al-Shifa hospital hnuaiah Hamas-te'n command centre an neih thu hi a lo sawi tawh a, US hian an thusawi hi a ṭum khatna atan a rawn nemnghet ve leh ta a ni. Mahse Hamas-te chuan he puhna hi an pha thung.

White House chuan hospital-ah Hamas firfiakte'n command centre an nei ngei a ni tih a sawi rualin, hospital-a inbeihna thleng erawh a duh loh thu a sawi a, civil mi leh damlo awmte himna chu ngaihtuah a ngai tih a sawi.