Pakistan-in Ukraine hnenah maktaduai 364 hu ralthuam a hralh

Sum lama harsatna tawk mek, Pakistan ram chuan US private company pahnih nen thawk dunin, ralthuam dollar mtd 364 man zet Ukraine ram hnenah a hralh nia sawi a ni.

British sipai bungraw phurtu thlawhtheihna chu Rawalpindi hmuna Pakistan Air Force base, Nur Khan aṭangin Cyprus-a British military base-ah thlawkin, chuta ṭang chuan Romania-ah ralthuam phurin ṭum nga lai a thlawk tih BBC Urdu chuan a tarlang. Pakistan erawh chuan Ukraine ram hnenah eng ralthuam mah an hralh lo tiin, ṭan a khawh thung.

American Federal Procurement Data System aṭanga a lan danin, Pakistan chuan 155mm silai mu hralhna tur chu "Global Military" nen USD mtd 232 hu leh, leh "Northrop Grumman" chu USD mtd 131 hu contract a ziahpui niin sawi a ni a, an contract hi October, 2023 khan a tawp tih an tarlang bawk.

BBC Rdu chuan State Bank of Pakistan data aṭang pawhin Pakistan-in ralthuam a thawn chhuah chu FY 2022-2023 chhungin 3000% zetin a pung tih a lang a ni, a ti. Mahse Pakistan Foreign Office erawh chuan an puhna hi phain, Ukraine ram hnenah silai leh silai mu eng chi mah an hralh lo tih sawiin, Pakistan chu ram pahnihte indonaah hian inrawlhna engmah nei loin "neutral" takin a awm tiin a sawi.