Putin-a'n media khuahkhirhna dan thar a pawm

Russian president Vladimir Putin chuan nakkum presidential election neih huna hman tur, media-te khuahkhirhna dan siam thar chu a pawm tih tualchhung news agency-te chuan an tarlang.

Nakkum March-a neih tur, Presidential election-ah hian kum 24 chhung ram lo hruai tawh, kum 71-a upa President Putin chuan a chuh leh ngei rin a ni. Putin chuan inthlan a chuh leh chuh loh tur chu Parliament-in election neih ni tur an ruat hnuah chiah a puang dawn tih a lo sawi tawh a ni.

Putin-a'n media khuahkhirhna dan thar a pawmah hian, Central Election Commission session cover theih chin pawh sawr zim niin, freelancer leh independent journalist-te pawh telh loh an ni maithei. Dan siam thar hnuaiah hian regional leh military thuneitute phalna la hmasa loin military base leh martial law hnuaia awmte hmuna commission chet dan chu mipui hriata puanzar khap a ni bawk.

Russia chuan sorkar eptu pawlte'n nasa taka an sawisel leh thu leng vak tam lutuk avangin Russia sorkar chuan website leh service tam tak a ti tawp tawh a, chung zingah chuan Facebook leh Instagram-te pawh an tel. He inkhuahkhirhna dan hi hman a nih theih nan, Ministry of Digital Development, Communications and Mass Media chuan internet khuahkhirhna bypass nana mi tam takin an hman virtual private networks (VPNs)-te chu block an tum a ni.