Israel-Hamas war : Israel sipaite'n Gaza damdawi in MRI unit-a Hamas ralthuam dah hmu chhuak

Israel sipaite chuan Gaza Strip-a Al-Shifa Hospital an luh chilhnaah, he damdawi in MRI unit-a Hamas firfiakte'n ralthuam an chhek hmu chhuakin, social media lamah a video hi an rawn dah chhuak bawk.

Al-Shifa damdawi in hnuaiah hian Hamas hian command centre an nei niin Israel chuan a lo sawi tawh a, hei hi US intelligence pawhin a dik ngei tih hriat a nih thu a lo nemnghet tawh bawk. Nilaini khan Israel sipaite hian damdawi in hi luh chilhin, room leh basement-te an en fiah a, mi thenkhat thu zawh fiah an nei bawk a ni.

Israel Defence Force (IDF) thupuangtu, Jonathan Conricus chuan damdawi in MRI unit-a ralthuam an hmuh chhuahna video hi dah chhuakin, he video hi an edit lo tih a sawi a, MRI building-a CCTV camera-te pawh an tilang vek bawk. Conricus chuan, "Hamas-te hian international law bawhchhiain, damdawi inte chu an sipaite chet lakna hmun atan an hmang tih chiang takin a lang a ni," a ti. MRI unit-a ralthuam an hmuh zingah hian AK-47, cartridge leh grenade-te an tel. Israel chuan Hamas-te hian damdawi inah hian command centre an neih bakah, ambulance pawh firfiaka chet an thawhna atante an hmang tel ṭhin niin a sawi.

IDF hian an thil hmuh chhuahte hi a dik ngei tih finfiah leh enpui turin BBC leh television danga thawk journalist ṭhenkhat chu Al-Shifa damdawi inah hian hruai lutin, Hamas ralthuam chhekte hi an entir niin BBC team chuan an sawi. Journalist-te hi damdawi ina doctor leh damlote erawh an biak phalsak an ni lo thung. Israel sipaite hian nimin khan damdawi in hi an dap chhunzawm leh a ni.

Israel-in damdawi in a luh chilh chungchangah hian US chuan Israel lam a chhan leh a, US president Joe Biden chuan Hamas-te chuan damdawi in chu Israel an beihna tura atana command centre-a an hman avangin, war crime thlentu an ni hmasa zawk a ni, a ti. Hemi rual hian Gaza luahsak chu thil tihsual lian tak tur a ni tiin, Israel leh Palestinian ram din chu an buaina chinfelna kawng awmchhun tur a nih tih Israel prime minister Benjamin Netanyahu a hrilh.

Gaza-a Hamas hruaitu Haniyeh in bei

Israel chuan an indo thlawhtheihna hmangin Gaza Strip-a Hamas hotu, Ismail Haniyeh in chu an bei tih an sawi.

Ismail Haniyeh hi kum 2017 khan Hamas political bureau hotu atan thlan a ni a, mahse, Qatar-ah a khawsa. Gaza-a a in hi Hamas hoin inhmuh khawmna atan an hmang ṭhin.

Kum 2006 khan Palestinian Authority president leh Fatah pawl hruaitu, Mahmoud Abbas chuan Haniyeh hi Palestinian prime minister atan a ruat a, mahse, kar khat hnu lekah Hamas-te hian Fatah pawl bei a, Gaza Strip aṭanga an paihthlak hnuah PM aṭang hian Abbas chuan a ban zui leh a ni. Mahse Haniyeh chuan ban a nihna hi pawm loin, Gaza-ah hian a kaihhruai Hamas chuan ro an rel zui ta a ni.