Myanmar : Sorkar hnathawk leh sipai bangte inralring turin hriattir

Myanmar sipai sorkar chuan an ram hmun hrang hranga sipai leh helpawlte inbeihna thleng mek avangin, sorkar hnathawk zawng zawng leh sipai bangte chu emergency atana lo inbuatsaih turin a hriattir.

Sipai sorkar chuan sorkar hnathawk leh sipai bangte chu emergency-a a ṭul anga hma la tur, unit din turin hriattir an ni tih Napyitaw administrative council secretary, Tin Maung Swe chuan a sawi. An ram khawpui, Naypitaw boruak erawh a muanawm niin a sawi bawk.

Hetih lai hian sipai sorkar ep tura democracy thlawptute'n sorkar an siam, National Unity Government (NUG) chuan 'Road to Naypitaw' campaign an buatsaih thung a, an ram khawpui chu sipaite kut aṭanga laksak an tum tih an sawi. NUG hi sipai sorkar dodaltu, helpawl ṭhenkhatin an thlawp a ni.