Israel-Hamas war : Israel PM-in civil mite tawrhna thlengah Hamas mawhphurtuah puh

Israel prime minister Benjamin Netanyahu chuan Gaza Strip-a beihpui an thlaknaah Palestinian civil mite tawrhna tlem thei ang bera thlen an tum chu a hlawhtling thei lo a, hei hi Hamas-te'n hmun him lama an insaseng tur an dan vang a ni tiin, civil mite tawrhna thlengah Hamas chu mawhphurtuah a puh.

Israel sipaite hian Gaza-a damdawi in lian ber, Al-Shifa hospital leh damdawi in hnuaiahte Hamas chuan tunnel siamin, ralthuamte an chhek a, damlo leh damdawi ina himna zawnga awmte chu inphenna atan an hmang a ni, an ti. Al-Shifa damdawi in an dapnaah pawh Hamas-te ralthuam dah khawlte pawh an lo hmu chhuak tawh a ni.

PM Netanyahu chuan civil mite thihna thleng chu thil lungchhiatthlak tak a ni tih a sawi a,"Civil mite tawrhna thlen lo turin kan theihtawp kan chhuah a, mahse, Hamas thung chuan civil mite tawrhtir turin hma an la ve thung a ni. Civil mite tawrhna a tlem thei ang bera thlentir kan tum pawh Hamas vangin kan hlawhtling thei lo a ni," a ti. Gaza City-a chengte chu a hmain insaseng turin leaflet hmangin an hriattir a, an cell phone-ahte an bia a, mi tam tak chu insaseng a, hetih lai hian Hamas hian civil mite chhuak lo tura fuihin,chhuah tumte pawh an dang nia sawi a ni.

Gaza health ministry chuan indona avang hian Palestinian mi 11,500 vel an thi tawh tawh a, an zingah hian nauang 4,700 chuang an tel niin a sawi.

Israel sipaite hian nimin khan Hamas-te'n Al-Shifa hospital bula an hren, Israel hmeichhe sipai ruang chu an la chhuak. Ningani khan Al-Shifa bula building-ah hian Hamas hren zinga hmeichhe pakhat ruang an lo la chhuak tawh bawk.

Gaza-a chhawmdawlna thawn luh titawp rih

United Nations chuan nimin khan Gaza Strip-a chhawmdawlna a thawn luh chu a titawp rih a, hei hi fuel tlakchham leh inbiakpawh theih loh vang niin a sawi.

United Nations' World Food Programme (WFP) chuan Gaza-a civil mite chuan ei tur an tlachham tawh a, ṭam hmabakin an awm mek a ni, a ti.

Hamas-te'n October 7-a Israel an beih hnuah, Gaza Strip-a Israel leh Hamas indona hi a kar sarihna a ni tawh a, inkahhai puang turin ram hrang hrangte'n nawr mah se, Israel lam chuan inkahhai puan tumna erawh a la nei lo. Mahse Gaza Strip-a civil mite ṭanpuina leh chhawmdawlna thawn luh nan erawh an beihpuithlak chawlh lawk ṭhin erawh a remti thung.