Nakkum January 7-ah Bangladesh inthlanpui nei dawn

Bangladesh Election Commission chuan nakkum January 7-ah an ram Parliament inthlan neih a ni dawn tih a puang.

Chief election commisioner Haibul Awal chuan Parliament seat 300-a inthlan hi January 7, 2024-ah neih a ni dawn tih sawiin, an rama politics buaina hrang hrang awmte chu chingfel tura inbiaknate nei turin party-te a ngen bawk.

Eptu party lian ber, Bangladesh Nationalist Party (BNP) chuan prime minister Sheikh Hasina a ban phawt loh chuan inthlanpui hi an boycott dawn tih a sawi. Inthlanpui chu party thlei bik nei lo, caretaker sorkar hnuaia neih an duh thu an sawi a ni. BNP hotu, prime minister hlui Khaleda Zia hi sorkar chuan house arrest-in a hreng mek a, ani bakah an party hruaitu dang ṭhenkhat pawh jail-a tang mek leh, ram danga himna zawnga tlanchhia an awm bawk a ni. BNP bakah Islamist party lian ber, Jamaat-e-Islami leh Islami Andolon Bangladesh (IAB) party chuan PM Hasina kaihhruai sorkar hnuaia inthlanpui buatsaih tur chu an pawm dawn lo tih an sawi ve bawk a ni.