Cabinet minister atan Suu Kyi-i ruat

Myanmar rama sorkar thar siamtu tur, National League for Democracy (NLD)-in Arpil thlaa thuneihna an chan hunah an party hotu lu ber, Aung San Suu Kyi-i chu cabinet minsiter-ah dah a ni dawn.

Aung San Suu Kyi-i hian British mi pasala neiin fapa pahnih an nei a, a fate hi Britain-ah chengin British citizenship an nei a ni. Myanmar rama sipai sorkar laia danpui siam chuan ramdang mi nupui/pasala nei leh an laka fa neite chu an ram President-a dah a khap a ni. Hei vang hian Suu Kyi-i pawhin President dinhmun a chelh thei dawn lo a, hei vang hian a thawhpui ṭha tak, Htin Kyaw chu kar kalta khan President atan thlan a lo ni tawh a ni.

Nimina parliament inkhawmah President Htin Kyaw chuan cabinet minister list hi thehlutin, Speaker Man Win Khaing Than chuan mi 18 te hming hi a chhiar chhuak a ni. Minister-te hna chanpual tur hi sawilan a la ni lo. Session hi minute 15 hnuah tihtawp zui nghal a ni.

Cabinet minister-ah hian mi 21 dah tur ni mah se, mi 18 hming chauh puan chhuah a la ni. Cabinet minister thar tur zingah hian Suu Kyi-i chauh hmeichhia a awm. Minister thar tur zingah hian politics vang lung-in tang tawh Thein Swe leh Mon National Party aiawh Naing Thet Lwin te, sipai thlawp USDP party senior member Thura U Aung Ko-te an tel.

Sipal lamin ministry pawimawh patum, defence, home affairs leh border affairs te an chang dawn thung a ni.

NLD in cabinet minister a ruatte hi an chanpual sawilang lo mah se, report thenkhat chuan Suu Kyi-i hian ministry pali - minister of the president's office, foreign affairs, electric power and energy, leh education-te a chang dawn niin an tarlang.