Brussels airport-ah bomb puak

Belgium khawpui, Brussels-a Zaventem airport-ah nimin khan ṭum hnih bomb a puak a, thi leh hliam zat hriatchian a la ni lo a, mahse local media-te chuan mi 13 thiin mi dang 35 velin hliam an tuar niin an sawi.

Bomb puah hun hi an ram sanaa zing dar 8 vel a ni a, a tipuaktute leh an tihpuah chhan hi hriat a la ni lo a, mahse airport hi khar nghal niin flight-te pawh cancel nghal vek a ni.

Pawikhawihtute hi hriat ni lo mah se, ni nga liamtaa kum 2015, November 13-a Islamic State (IS) firfiakten France khawpui, Paris an beihnaa a mawhphurtu bera puh, Salah Abdeslam chu Brussels-ah hian man a ni a, hei nen hian inzawmna a neih rin a ni. Thawhṭanni khan Interior Ministr Jan Jambon chuan Abdeslam man a nih avang hian firfiakten phuba lak tuma an ram an beih mai a hlauhthawnawm thu leh, an inralrin a ngaih thu pawh a lo sawichhuak tawh a ni.

Emergency service chuan airport enfiah hna hi an thawk nghal a, bomb la puak lo dang pawh an hmuhbelh nia sawi a ni. Belga news agency report chuan bomb pahnih a puah hnu hian silai kah ri hriat a ni bakah, Arabic ṭawnga au rite pawh hriat a nih thu a tarlang.

Airport bula rel service pawh tihtawp nghal a ni a, thuneitute chuan airport bul hnaia kal lo turin mipuite an hriattir nghal bawk.