Brussels beihnaa thite an sun IS in an tih niin an chhal

Belgium khawpui, Brussels-a Thawhlehni zinga airport leh metro station-a bomb puak vanga thi chu mi 43 an tling a, nimin khan Brussels-ah hian mitthite sunna hi hman a ni. Bomb puak vang hian mi 250 velin hliam an tuar bawk.

Islamic State (IS) firfiak pawl chuan airport beitu an nih thu hi an sawi. Firfiak pawl hian A'maq news agency-ah thuchhuah siamin, "Islamic State fighter-te chuan Thawhlehni khan Belgium khawpui Brussels-a airport leh centrla metra station beih nan bomb an tipuak a ni. Hei hi ṭangrual ramten IS laka beihpui an thlaknaah Belgium ram a tel ve vang a ni" a ti. Hemi rual han an pawl laka beihpui thlaknaa tel ram dangte a vau tel nghal bawk.

Thuchhuahah hian IS fighter-ten Zaventem Airport-a bomb an tihpuah hma hian silai an hmetpuak hmasa niin an tarlang a, hei bakah hian an fighter pakhat chuan Maelbeek metro station-ah thihchilh bomb tipuakin a martar ta tih a tarlang bawk. Bomb puak vanga thi mi 34 zinga mi 14 chu airport beihnaa thi an ni a, metro station-a bomb puakah mi 20 an thi bawk.

Belgium Prime Minister Charles Michel chuan Thawhlehni-a Brussels-a thil thleng chu Belgium rama pawikhawihna thleng rapathlak ber a ni tiin, an ram tana ni lungchhiatthlak tak a ni, a ti. Hemi rual hian mi dawihzepte thiltih avang chuan an ram chu a zam mai dawn lo tih a sawi tel nghal bawk.

Belgium Interior Minister Jan Jambon chuan Thawhlehnia an rama pawikhawihna rapthlak tak thlenga thite chu rampum huapin ni thum chhung sun an ni dawn tih a sawi.

Brussela-a Place de la Bourse ah firfiakte pawikhawihna avanga thi te sunna hi hmangin bati an chi a, pangpar leh an ram flag-te an dah bawk. Nimin chhun khan mitthi sunna atan hian minute khat ngawi rengin an ding bawk a ni.

Ram hrang hrangte chuan Brussels-a pawi-khawihna thleng hi an dem thu an sawi a, firfiaka chetna an demna leh, mitthite an sunna lantir nan Thawhlehni zan khan an ramam hmun pawi-mawhte chu Belgium flag rawngin an ti eng a ni.

Police-te chuan pawi-khawihtute hi ngawrh takin an zawng mek a, bomb puah hmaa Zaventem airport CCTV-a lang mi pakhat chu rinhlelh niin an zawng mek a ni. An mi rinhlelh hi airport-a bomb tihpuah a nih hma lawkin thihchilh bomb tipuaktu nia rin, midang pahnihnen airport-ah hian hmuh an ni, a suitcase ken chu bomb puak ve thei ta lo awmna ni ngeia hriat a ni bawk.