North Korea-in South Korea president office beihah vau

North Korea chuan South Korea leh United States sipaiten nunchan an zirdun mek chu dodal chhunzawm zelin, Seoul-a South Korea president office chu beihah a vau. 

NKorea state news agency KCNA chuan Committee for the Peaceful Reunification of Korea thuchhuah tarlangin, NKorea sipaite chu a ṭul hunah SKorea President Park Geun-hye-i office bei tura hriattir an ni mai dawn tih a sawi. An thuchhuah chuan larger caliber rocket launcher button chu an hmet a nih chuan President Park-i office chu meialh leh meivapa a chang nghal mai dawn a ni, a ti. 

Thawhṭanni khan NKorea hotu Kim Jong-Un chuan  large-caliber multiple rocket launcher enchhinnaah a lo telpui tawh a, hei hi thla khat chhunga rocket launching system thar an enchhin ṭum hnihna a ni. March 3 khan rocket laucnher sytem thar chu a vawikhatna atan an enchhin a, Kim chuan an ram sipaite chu eng hunah pawh nuclear ralthuam an neihte hmang thei tura inbuatsaih turin a hriattir nghe nghe. 

US leh South Korea sipaite hian March 7 aṭang khan indo nunchan an zir dun, 'Key Resolve' leh 'Foag Eagle' tia an vuah chu an nei mek a, 'Key Resolve' zawk hi kar kalta Zirtawpni khan an zo a, mahse 'Foal Eagle' hi April 30 thleng an la nei chhunzawm dawn a ni. NKorea chuan ram pahnih sipaiten nunchan an zirho hi a dem thu a lo sawi fo tawh a, indo tura inbuatsaiha a puh a ni.