Brussels beihnaa inhnamhnawih mi paruk man

26th March, 2016

Belgium police-te chuan an ram khawpui, Brussels-a airport leh metro station-a bomb tihpuahnaa inhnamhnawiha rinhlelh, mi paruk an man tawh.

Thawhlehni-a Brussels khawpuia pawikhawihna rapthlak tak thlengah hian mi 31 an thi a, midang 270 velin hliam an tuar. Islamic State (IS) firfiak pawl chuan he pawikhawihna hi an pawl tih niin an chhal.

Police-te chuan pawikhawihtute hi ngawrh taka zawngin, rinhlelh mi parukte hi Ningani khan Brussels khawpui laili laiah leh, Schaerbeek leh Jette-ahte an man a ni. An mi mante chanchin leh nihna kimchang hi puanzar a ni lo a, prosecutor office chuan thubuai siamsak an nih dawn leh dawn loh a ngaihtuah ang.

Ningani vek khan Belgium interior leh justice minister-te chuan an rama pawikhawihna thleng chungchangah, airport-a thihchilh bomb tipuaktu IS fighter chu Turkey ramin a hnawhchhuah hnuah an rama a lut chu hriatchhuah a nih loh avangin an mawhphurhna-ah ngaiin minister an nihna aṭangin banna an theh lut. Prime Minister Charles Michel chuan a banna thehlut hi a pawmsak lo a, indona an hmachhawn mek lai a ni a, an bang thei lo ang tiin an hna chu chelh chhunzawm turin a ngen.

Thihchilh bomb tipuaktu nia rinhlelh mi pathum zinga pakhat, Brahim El Bakraoui chu kumin July thla khan Turkey sipaiten Syria nena an inri-na bula an man hnuah an ram aṭangin an hnawtchhuak a ni.

Brussels khawpuia pawikhawihna a thlen hnu hian European Union Justice and Home Affairs minister-te chuan intelligence data te inhrilh tawn zung zung tura inremna siam a ṭul thu an sawi. EU ram 28-te chuan ram ṭhenkhatten intelligence data te ramdang hnena an hriattir duh loh vang leh, thawhdunna a ṭhat tawk loh avangin pawikhawihna thleng tur lo ven theih pawh an hriat loh phah ṭhin niin an sawi.

France chuan an rama pawikhawihna thlen tuma ruahmanna an tihtlawlh sak niin a sawi. France thuneitute chuan Ningani zing khan Paris khawpui beih tumtu, France ram mi pakhat chu man a nih thu a sawi a, Paris hmarlama a chenna in chu counterterrorism agency, DGSI chuan dapin bomb an man nia sawi a ni.