Pope Francis-an muslim ke a silsak

Roman Catholic Koh-hran hotu Pope Francis chuan Easter Week Mass a buatsaihah Ningani khan Muslim, Orthodox, Hindu leh Catholic refugee-te ke silin a fawh sak a, Pathian fate vek an ni tih a sawi.

Pope hian Holy Thursday-ah hian Isua Krista-in khenbeh a nih hmaa a zirtirte ke a silsak ang hun kha a hmang ṭhin. Kuminah hian Rome khawpui pawna Castelnuovo di Porto-a ral-tlante awmna hmunah ke sil hun hi a hmang a, he hmuna sakhaw hrang hrang betu raltlan awmte ke chu a silsak a ni.

Raltlante hian Pope hi ṭawng hrang hrangin an lawmna thu banner-a ziakin an lo lawm a, he hmuna hian mi 892 an awm a, mahse an zinga ṭhenkhat erawh chu mass buatsaihah hian an tel lo.

Pope chuan, 'Culture leh sakhaw hrang hrang nei kan nei a, mahse unau vek kan ni a, inrem taka awm kan duh vek a ni" a ti.

Ke sil inkhawmah hian Isua zirtir zat, mi 12-te chu an ke silsak tur hian thlanchhuah an ni ṭhin. Vatican chuan ke silsak tu hi mipa chauh a ni tur tiin dan lo siam tawh mah se, kumin January thla khan dan hi siamṭhain hmei-chhiate pawh thlan a phalsak tawh a ni. Dan thar siamah hian ke sil rawngbawlnaah hian Pathian fa tupawh an tel thei tih a ni.

Holy Thursday-a Pope-in refugee center- a mi 12 ke a silsak tura thlanchhuahte hi hmeichhia pali leh mipa pariat an ni. Hmeichhe pakhat hi center-a hnathawk niin, midang pathum chu Eritre ram aṭanga pem lut, Coptic Christian an ni. Mipa pariat thlan chhuah zinga mi pali chu Nigeria mi Catholic kohhran an ni a, Mali, Syria leh Pakista aṭanga kal Muslim pathum bakah India ram mi Hindu pakhat a ni.