Bosnian Serb president hlui kum 40 tang dawn

International Criminal Tribunal for the former Yugoslavia (ICTY) chuan Bosnian Serb president hlui Radovan Karadzic chu kum 40 tang turin Ningani khan a chungthu a relsak.

Radovan Karadzic hi kum 1995 July thlaa Srebrenica-a mi tam tak suatna-ah mawhphurtuah puh a ni a, hemi ṭum hian Bosnian Serb sipaite chuan muslim mi 7,000 chuang an that a ni. He pawikhawihna rapthlak tak thlen lai hian Karadzic hi Republika Srpska president a nih bakah, Bosnian Serb army VRS commandr a ni bawk. He pawihhawihna thleng tur lo dang tur hian thuneihna a nei a ni, tiin a chungthu ngaihtuahtu judge chuan a sawi.

Karadzic hi kum 2008 July thla khan man niin, kum 2009 October thla aṭangin a thubuai ngaihtuah ṭan a ni. Thubuai panga-ah thiam loh chantir a ni a, thubuai pakhat hi a mihringpuite laka pawikhawihna rapthlak thlenah puhna niin, a dang pali hi dan bawhchhiaa puhna a ni.

Ningani-a president hlui chungthu ngaihtuah lai hian Srebrenica insuatnaa thi chhungte mi 150 chuang an tel. President hlui hremna pek chu a na tawk lo nia an ngaih thu sawiin, a damchhung lung-in tang tura an duh thu an sawi.