Thailand sorkar duh lohna lantir

Thailand khawpui Bangkok-ah nimin khan mi tam takin sorkar duh lohna lantirin kawng an zawh. Kawng zawhte hian sorkar chu bang tura an phut bakah, an ram danpuite siamṭhat a, eptu pawl hrekbeh an nih ṭhinte tihtawp an phut a ni.

Zirlai pawlte chuan vawi tam tak sorkar duh lohna hi an lo lantir tawh bawk a, mahse nimina kawngzawhte hi zirlai pawl ni loin pawl hrang hrang mi leh sa an nih thu an sawi. Kawngzawhte chuan dic­tatorship an duh tawh lo a, democracy an duh thu an sawi. Prime minister Prayuth Chan-ocha chu bang turin an phut a, hei bakah an rama lal thuneihna sang lutuk pawh tihtawp an duh thu an sawi bawk. Thailand lal chhungkua hi dan khauh tak hmanga humhalh tlat an ni a, lal emaw, lalchhungkaw mi emaw sawisel chu hremna na tak pek theih an ni. 

Mipuite hi Bangkok-a Democracy Monument bulah an pungkhawm a, buaina chhuak tur vengin police officer 600 vel duty tir an ni. Hetih lai hian lal rorelna thlawptu mi ṭhenkhat chuan nimin vek khan an ram lal, King Maha Vajiralongkorn leh lal chhungkaw dangte thlalakte kengin an thlawpna a lantir ve bawk. Royalist group, Coordination Center of Vocational Students for the Protection of National Institutions (CVPI) hruaitu Sumeet Trakulwoonnoo chuan mipuiten sorkar laka an lungawi lohna an lantir chu an ngaimawh lo a, mahse lal rorelna chu khawih danglam a ni tur a ni lo, a ti.