Israel-Hamas war : WHO-in Al-Shifa hospital 'death zone' tiin a sawi

Israel sipaite'n kar hmasa lama an luh chilh, Gaza City-a damdawi in lian ber, Al-Shifa Hsptial chu World Health Organisation (WHO) kaihhruaiin joint UN team-in an tlawh.

Joint team hian darkar khat vel damdawi in hi an enkual a, an enfiah hnuah WHO chuan 'death zone' a ni ringawt tiin a sawi. Hospital-ah tank leh silaia kahna hnuhmate hmuh tur awmin, compound luhna bul mai chu thlanmual lian tak awmin, mi 80 phum an ni tia hrilh an nih thu an sawi.

Kar liam ta Inrinni khan damdawi in hi mi tam takin an chhuahsan a, an zingah hian damlote pawh an tel. Medical staff ṭhenkhat chuan Israel sipaite'n insawn chhuak turin an hriattir niin an sawi. Mahse hei hi Israel lam chuan an pha thung a, Israel sipaite chuan chhuak tura thupek engmah an tichhuak lo a, mahse, insawn chhuak duhte erawh kawng him lamah an kalna tur ngaihtuahpui an ni tiin an sawi thung.

Damdawi inah hian damlo 300 vel an la awm mek niin WHO chuan a sawi a, damlo leh thawktute hi Gaza-a health facility danga sawn an nih theih dan tur an ruahman mek tih sawiin, hemi atan hian Israel leh Hamas inkahhai puang turin an ngen nawn leh bawk.

Israel sipaite hian Al-Shifa hospital hnuaiah Hamas-te'n command centre an nei tih sawiin, he damdawi in hi luhchilhin an endik a ni. Damdawi in chhungte an enfiahnaah, MRI unit leh hmun dangte Hamas-te'n ralthuam chhekna atana an hmante an hmu chhuak tih sawiin, a video-te pawh an lo tichhuak tawh bawk.