Syria sipaiten Palmyra khawpui an la let ta

Syria sipaite chuan Russia thlawhtheihna puihna hmangin Islamic State (IS) firfiakte kut aṭangin an rama khawpui pawiawh, Palmyra chu an la let leh thei ta.

State television chuan sipaite hian Palmyra khawpui pum hi an thuneihna hnuaiah an dah thei tawh niin a tarlang. Hetihlai hian nimin zing khan khawpui chhung khawchhak lamah chuan silai puak ri hriat la ni mah se, IS firfiak tam zawk chu an tlanchhe tawh a ni.

Palmyra hi hmanlai thil hlui leh hlu tak tak awmna khawpui pawimawh tak a ni a, khualzin pawh a hip hle. UNESCO World Heritage site-ah puan a ni bawk. Syria tualchhung indona a thlen hma, kum 2011 hmalam kha chuan kumtinin he khawpui tlawhtu khualzin hi mi sing tel an awm ṭhin.

Kum 2015 May thla khan Palmyra khapwui hi IS firfiakte hian Syria sipaite kut aṭangin an laksak a, an lak hnu hian khawpui chhunga hmanlai hmun hlui leh thil hlu tak tak eng emaw zat an tichhe tawh a ni. An thil tihchhiat zingah hian kum 2,000 zeta upa temple pahnih pawh a tel a ni.