Pakistan leh Iran chuan an insumdawn tawnna chu kum 2021-a dollar tluklehdingawn 5 hua tihlenna tur thuthlung an sia. 
Pakistan rama ni hnih cham tura kar kalta Zirtawpni-a zin, Iran President Hassan Rouhani leh Pakistan Prime Minister Nawaz Sharif-te chuan ram pahnihte insumdawn tawnna tihlen hi an rel a ni. Hruaitu pahnihte inkawmnaah hian Iran aṭanga Pakistan-a electricity pek luh tihpun te, insumdawn tawnna tihlen leh gas pipeline plan ennawn chungchangte an sawidun a ni. 
Ram pahnihte insumdawn tawnna hi kum 2009-10 khan dollar tluklehdingawn 1.32 hu a ni a, mahse hei hi kum 2010-11 khan dollar maktaduai 432-ah a tlahniam a ni. Hei hi khawthlang ramten Iran-in nuclear programme a kalpui avanga kawng hrang hranga an hrek vang a ni. 
Iran hrekna tam zawk hi kumin January thla khan hlih a ni a, hei vang hian sumdawnna lam pawh chak zawka a kalpui chhunzawm theih beisei a ni. Iran hian Pakistan tan hian electricity megawatt(MW) 100 vel a pe chhuak mek a, hei hi MW 1,000 a tihpun tumin ram pahnihte hian inbiakna an nei mek a ni. 
Energy lam indaihlo tak, Pakistan hian ni khatah power hi darkar 12 a tihtawp ṭhin a ngai a, hei vang hian Iran 
aṭanga oil, gas, iron leh steel tam zawk lakluh dan kawng a dap mek a ni. Hetihlai hian Iran chuan Pakistan textile, surgical goods, sports goods leh agricultural products lam a ngaihven hle thung.