Japan-ah eptu party lian din

Japan ramah kum 2012 hnu lamah eptu party lian ber tur chu nimin khan din a ni a, hei hian Parliament upper house inthlan neih turah Prime Minister Shinzo Abe-a kaihhruai party tan hmabak hautak tak a siam ngei rin a ni.

Party din thar hi Minshinto tih a ni a, Democratic Party tia sawi a ni bawk. He party thar hi eptu party pahnih Democratic Party of Japan (DPJ) leh Japan Innovation Party-ten inchhunfin-a an siam a ni a, party hotu atan DPJ chief Katsuya Okada chu thlan nghal a ni.

Party thar tlangzarhna inkhawmah thu sawiin, Okada chuan party thar an siam chu an ram tana chhinchhiah tlak a nih thu sawiin, an zalenna, thawhhona ṭha leh an ram tana mawhphurhna an neihte chu thupuiah hmangin Mnshinto din chhan a nih thu a sawi.

Okada chuan Japan mipui-te dikna chanvo chu PM Abe-a kaihhruai sorkar hnuaiah chuan a derthawng hle tih a sawi a, hei vang hian sorkar lai policy ṭha lo tak takte tihtawp a, sorkar paihthlak a nih theih nan party thar chu din a ni, a ti.

Eptu party thar hian Japan Parliament, Diet-a in hnih-ah member 156 a nei nghal a, lower house-ah member 96 leh uuper house-ah member 60 a nei a ni. Mahs rorellai, ṭangrual party hian lower house-ah two-third majority a neih phak bakah upper house-ah pawh majority a nei a ni.