Sipai lama thawhdunna tur Poland leh US-in ziak

Poland defence minister Mariusz Blaszczak chuan kar liam ta Inrinni khan US secretary of state Mike Pompeo chu sipai lam thawhdunna tur inremna thuthlung a ziah pui. 

An thuthlung ziah hi Enhanced Defense Cooperation Agreement (EDCA) tih a ni a, sipai lama ram pahnihte thawdunna tur a ni. He inremna hnuaiah hian Poland rama US sipai regional headquarters din tum a nih bakah US sipai dah belhna turte pawh a tel bawk.

Kum 2021-ah chuan US army 5th corps-te chu Poland-a dah theih tura ruahman a ni a, heng hmalakna te hi a hlawhtling thei a nih chuan US sipaite hi Poland ramah hian 1,000 velin an pun belh dawn a, a awm sa nen an vaiin 5,000 vel an awm thei tura beisei a ni.

Heng sipaite awmna tur military quarter te, an chaw dawn tur te, kum tina fuel an dawn tur te, ralthuam an hman tur leh an ralthuamte leh bungrua dahna tur te bakah an awmna tur hmunhma buaipui tur zawng zawng hi Poland chuan a tum dawn niin Polish Press Agency chuan a tarlang a, heng atan hian euro maktaduai 113 seng tura inremna an ziah thu a tarlang bawk.