Putin leh Lukashenko-ten Belarus-a buaina chinfel thuai tum

Russia president Vladimir Putin leh Belarus president Alexander Lukashenko chuan kar liam ta Inrinni khan Belarus-a buaina chu tihziaawm a nih theih nan inbiakna an nei.

Belarus-a buaina chhuah chhan hi an ram president Alexander Lukashenko chu bang tura an phut vang a ni. August 9-a an ram President thar thlanna neihah President Lukashenko hi thlan nawn leh a ni a, mahse mipuite chuan he inthlanah hian thil dik tawk lo awmin, inthlanna chu a felfai lo niin an sawi a, hei vang hian lungawi lohna an lantir zui ta a ni. Central Election Commission  chuan August 9-a presidential election neihah khan Alexander Lukashen­ko hian vote tla aṭangin  80.1% a hmuh thu tarlangin, Lukashenko khingpui thawm nei lian ber Svetlana Tikhanovskaya chuan vote tlaa 10.12% chauh a hmuh thu an tarlang bawk. Lukashenko hi an ram president vawi rukna chelh tura thlan a nih thu Central Election Commission chuan a tarlang. Eptute chuan Elec­tion Commission-in vote hmuh zat a puan hi an pawm lo a, Tikhanovskaya chuan vote chhiar ṭha leh tura phutin, dik takin vote hi chhiar ni se vote tla aṭanga 60% aṭanga 70% vel a hmuh a rin thu a sawi. 

Tualchhunga buaina thleng chungchang hian kar liam ta khan Lukashenko leh Putin-te hi phone hmangin an inbia a, Alexander hian an rama thil thleng chu Putin hi a sawpui a ni. Belarus ram chhunga an buaina chu chinfel vat a nih tur thu Kremlin thuchhuah chuan a tarlang. Buaina a punlun zel a nih chuan Putin chuan an ram sipaite chu a thawh hreh dawn lo tih Lukashenko chuan a sawi bawk.