Pakistan-a Easter Day lawmtute beihnaah mi 72 thi

Pakistan-a Lahore khawpuiah Pathianni zan khan Kristiante Easter Day hmanna hmunah thihchilh bomb a puak a, mi 72 an thi a, midang 300 velin hliam an tuar.

Pakistan Taliban firfiak pawl peng pakhat, Jamaat-ul-Ahrar group chuan thihchilh bomb tipuaktu an nih thu leh, Kristiante chu an bitum ber an nih thu an sawi.

Bomb puahna hmun hi Gulshan-e-Ishaq park a ni a, Easter Day lawm vangin ṭum dang aiin park-ah hian mihring pawh an tam a ni. Hliam tuar zinga ṭhenkhat hi an dinhmun a ṭha lo hle a, thi zat pawh hi an la punchhoh rin a nih thu official-te chuan an sawi.

Pawikhawihna a thlen hnu hian Jamaat-ul-Ahrar pawl thupuangtu, Ehsanullah Ehsan chuan Prime Minister Nawaz Sharif-a tana an pawl thuchah siam a tichhuak nghal a ni. Ehsan chuan PM hnenah hian an pawlin Lahore khawpui an luh tawh thu leh, pawikhawihna lian zawk an thlen zel tur thu a sawi.

Jamaat-ul-Ahrar hi Tehrik-e-Taliban Pakistan aṭanga chhuak a ni a, kum 2014 khan Omar Khalid Korasani-an a din a ni. Vawi eng emaw zat Pakistan civil mi leh security force-te lakah pawikhawihna an thlen tawh a, Islamic State (IS) nen an inthlunzawm niin an lo sawi tawh bawk. Kum 2015 March thlaa Lahore khawpuia Roman Catholic biak-in beih a nih ṭuma mi 15 thihna thleng pawh kha an pawl tih niin an chhal a ni.

Pakistan police-te chuan pawikhawihtute hi manchhuah ngei tumin ngawrh takin an zawng nghal a, rawng taka civil mite beitute chu an phu ang hremna pek ngei an tum tih an sawi.

United Nations Secretary-General Ban Ki-moon leh khawvel ram hrang hrang hruaitute chuan Pakistan rama pawikhawihna thleng chu an dem thu an sawi.

Punjab province chief minister Shahbaz Sharif chuan park beihnaa thite sunna chu ni thum chhung neih a ni dawn tih a sawi. Bomb puahna hi park chhunga naupang pipu awmna bul a ni a, thi zinga a tam zawh pawh hi naupang leh hmeichhia an ni.