Israel court-in gas deal hnawlsak

Israel Supreme Court chuan Israel natural gas field tihhmasawnna tura Israel leh US company ten inremna an siam chu Pathianni khan a hnawlsak.

He inremna hi nikum khan Texas-based Noble Energy company leh Israel-based Delek Group te chuan Israel rama gas field lian bera hna thawhna turin an lo ziak tawh a ni. Mahse inremna an siam dan hian sawizui a hlawh hle a, inremna thuthlung an siam chu sorkarin engmah a siam danglam theih dawn loh vangin gas man pawh an duh dan angin an tisang thei dawn niin an sawi. Hei vang hian Pathianni khan Supreme Court chuan he inremna siam hi a hnawlsak a ni.

Member panga awmna judge chuan gas deal hi ngaihtuahin inremna siam tawh hi a hnawlsak a, hemi rual hian sorkar hnenah inremna kalphung chu siamṭha turin kum khat hun a pe a, hemi chhunga a siamṭha lo a nih chuan inremna hi cancel vek a ni dawn tih an hrilh.

Prime Minister Benjamin Netanyahu chuan sorkarin inremna a lo siam tawh Supreme Court-in a hnawlsak chu a sawisel a, hei hian an ram economy thlengin a nghawng phah dawn a ni, a ti. Supreme Court thutlukna siam chu Israel rama gas reserve tihhmasawn tumna tihchhiat tumnaah a puh. Sorkar inrelbawlnaah judicial system chu inrawlh nasa lutukah a puh a, hei hian sumdawngte tan thlengin boruak duhawm lo a siam phah zawk a ni, a ti.