Chief Justice sawiseltu minister sum chawitir

Bangladesh Supreme Court chuan cabinet minister pahnihte chu Chief Justice chungchanga an thusawi avangin pawisa chawi turin a hrem.

Pathianni khan Chief Justice Surendra Kumar Sinha kaihhruai full bench chuan Food Minister Qamrul Islam leh Liberation War Affairs Minister AKM Mozammel Huq-te chu an ram pawisa Tk 50,000 ve ve chawi turin a hrem. An sum chawi tur hi an pe duh lo a nih chuan ni sarih chhung jail-ah tantir an ni ang. Tun ṭum hi court sang berin cabinet minister te a hremna hmasa ber a ni.

March 5 kha Food Minister hian Jamaat-e-Islami hruaitu, Mir Quadem Ali chungchang ngaihtuahtu bench thar din a phut thu leh, he bench-ah hian chief justice chu telh ve lo tura a duh thute a sawi a ni. Liberation war minister pawhin Mir Quasem chungchang avang hian chief justice hi a sawisel bawk.

Attorney General Mahbubey Alam chuan minister pahnihte hi an hna chelh chhunzawm tir an ni dawn em tih chu cabinet-in ala ngaihtuah dawn tih a sawi.