Khawvel pumah Covid-19 vanga thi 3,50,000 chuang an awm tawh

China-a Wuhan khaw­puia nikum December thlaa a len ṭan aṭanga nimin thleng khan khawvel pumah coronavirus vanga thi mi 3,50,000 an chuang tawh.

Worldometer report aṭanga a lan dan chuan nimin chawhnu lam thleng khan thi zat hi 3,52,604 an tling tawh a, USA chuan tuar nasa berin mi 1,00,57-in an thihpui tawh. US -ah hian thihpui hi an tam fal hle a, UK chuan dawtin mi 37,048-in an thihpui tawh a ni. Italy chu hrileng thihpui tam ram pathumna niin mi 32,955-in an thihpui a, France-ah mi 28,530 an thi tawh a, Spain chuan dawtin 27,117-in an thihpui tawh bawk.  

Hri kai enkawl dam hi eng emaw zat awm ve bawk mah se hrileng hian ziaawm lam a la pan thei lo a, hri kai tam lamah pawh US bawk hi an sang ber a, mi 17,25,278-in an kai tawh a ni. Brazil (3,94,507) chu kai tam ber dawttu an ni thung a, Russia chu pathumna niin mi 3,70,680-in an kai tawh. Brazil leh Russia-ah hian hrileng kai hi tam viau mah se UK, Italy, France leh Spain-te aiin thihpui an la tlem zawk.

Hrileng inṭanna ram China chu hriin a nghawng nasat ram 14-naah a awm ve phak ṭawk tawh a, hri kai hmuh chhuah thar pawh an awm tawh mang lo. China-ah hian mi 82,993-in hri hi an kai a, 4,634-in an thihpui bawk a ni.

Data hi danglam reng mah se Covid-19 kai enkawl dam leh tawh hi khawvel pumah 24,45,435 an awm tling tawh a, mi 57,01,477 chuangin an kai tawh thung. Nimin chawhnu lam thleng khan hri kai enkawl lai hi mi 29,03,438 an awm a, 53,095 (2%) vel chu an dinhmun a ṭha lo hle niin Worldometer chuan a tarlang. 

Spain sorkar chuan an rama Covid-19 vanga thite chu nimin aṭang khan ni 10 chhung sunna hun hman a ni dawn tih a puang. 

Spain hi Europe-ah hri leng tuar nasa ber zinga mi a ni a, mi 27,000 dawn chu he hri vang hian an thi a ni. 

Hri leng vang hian thla hnih leh a chanve chhugin chu ram pumah inkhar­khipna kalpui a ni a, mahse ziaawm lam a pan tawh avangin khuahkhirhna siamte pawh thlahdul chhoh ṭan a ni tawh. 

Cabinet meeting-in hripui vanga thite, ni 10 chhung sun tura a pawm hnuah sorkar thupuangtu Maria Jesus Montero chuan nimin aṭang khan June 5 thleng chu ram chhunga sorkar building 14,000 chuangah an ram flag chu a ngul chanveah zar a ni dawn tih a sawi. 

Montero chuan an rama hripui vanga thi zinga 80% chu kum 70 leh a chunglam an ni tih sawiin, "Heng mite hi ram dinna kawnga mi pawimawh tak tak an ni," a ti. 

Russian president Vladimir Putin chuan an rama Covid-19 hri leng chuan a vanglai a pel tawh tih a sawi a, World War II Parade pawh June 24-ah neih a nih tur thu a sawi bawk.

January 31 khan Russia-ah hian Covid-19 hri kai hmuh chhuah a ni a, Nilaini khan Russia-ah hian hri kai hriatchhuah thar mi 8,338 an awm a, ram puma hri kai zawng zawng hi 370,680 an tling tawh a ni.  

Russia hi US leh Brazil tih lohah chuan Covid-19 hri kai tamna ber ram a ni mek a, Thawhlehni khan hri vanga thi hi mi 174 an awm a, he hri vanga thi zawng zawng hi mi 3,968 an awm tawh a ni. Thawhlehni vek khan hri kai enkawl dam hi darkar 24 chhungin mi 12,000 an awm thu official-te chuan an tarlang a, hei vang hian hri kai enkawl dam tawh zawng zawng hi mi 142,208 an tling tawh bawk. 

May 9-a neih an tum World War II Parade chu Covid-19 hri leng vanga ṭulh a nih hnuah, June 24-ah neih leh zawk tur a nih thu Putin chuan a sawi. He parade hi Nazi Germany-te hnehna chhinchiahna niah hman a ni a, kumin hi a vawi 75-na tur a ni tawh a ni.

Covid-19 len ṭanna nia sawi, China-a Wuhan khawpuiah chuan hri leng thawh hnihna a thlen lohna turin hma lak chhunzawm zel a ni a, hemi atan hian khawpuia chengte chu test runpui neihpui mek an ni. 

Heath commission chuan ni 12 liam ta chhung khan khawpuia cheng mi maktaduai 11 zinga maktaduai 6.68 chu nucleic acid test neihsak hman an ni tih sawiin, an zingah hia mi 206 chu  hri kai, mahse an taksaa natna langchhuak lo, asymptomatic an awm tih a sawi. 

Wuhan sorkar chuan khawpuia cheng zawng zawng chu test neih sak vek an ni dawn tih sawiin, hmaih an awm lohna turin official-te chu in tinah kalin testing station hnai bera kal turin an hrilh zel tih a sawi. Test nei lote chu  bazar leh bank-ahte kal phal an ni dawn lo a, hna an thawhna leh zinnaah khuahkhirhna siamsak an ni dawn bawk a ni.