Israel-Hamas war: Al-Shifa Hospital hnuaiah meter 55-a thui leiverh hmu chhuak

Israel sipaite chuan Gaza City-a damdawi-in lian ber, Al-Shifa Hospital hnuaiah Hamas firfiakte siam, leiverh meter 55-a thui an hmu chhuak tih an sawi.

Pathianni khan thuchhuah siamin, Israel chuan medical facility hnuai, meter 10-a thukah lei verh meter 55 (feet 180) an hmu chhuak tih an tarlang. An official Telegram channel-ah pawh an leiverh hmuh chhuah video hi an dah chhuak bawk. Israel sipai thupuangtu, Daniel Hagari chuan bulldozer hmanga hospital complex pawn lam bang an thichhiatna aṭangin hmuh chhuah a nih thu a sawi a, a luhthlakna step hi thira siam niin kawngkhar a awm bawk tih a sawi. Mahse sipaite hian firfiakten thang an kam hlauhthawn vangin a kawngkhar hi an la tichhe mai ngam rih lo tih a sawi bawk a ni.

He leiverh hi Al-Shifa hospital hnuaia Hamas ho command centre nia Israel sipaiten an sawi bul maiah hmuh a ni.

Hamas mi mante Shifa hospital-a an hruai lai video hmuh a ni

Israel sipaite chuan October 7-a Hamas firfiakten Israel an beih ṭuma an mi man ṭhenkhatte chu Al-Shifa Hospital-ah an hruai ngei a ni tih finfiahna video hmuh a nih thu sawiin, he video hi an pho chhuak.

Shin Bet leh Israel Defence Force (IDF)-in video an pho chhuahah hian Hamas-ten an mi man zinga foreigner pahnih, Thailand leh Nepal mi nia hriatte Al-Shifa Hospital-a an hruai lut lai a lang. Video pakhatah hian an mi man chu Hamas mi eng emaw zatin an pawt lut lui a, pakhat zawkah chuan a awm leh kea hliam nei, mi pakhat chu stretcher hmangin an zawn lut bawk a, a thisen chhuak laite pawh a lang.

IDF chuan Hamas mi mante hi eng ram mi nge tih an sawichiang lo a, mahse video hi hospital chhunga footage ami ngei a nih thu leh, he video hmuh tum hian hun rei tak an buaipui thu an sawi. Video-ah hian Hams-ten IDF military jeep an mansak chu hospital-a an tlan luhpui lai a lang bawk a ni.

Gaza-ah ni tin fuel phur truck 2 luh remti

Israel chuan Gaza Strip-ah fuel phurtu truck chu nitin pahnih zel a luh a phalsak dawn.

Hemi chungchang hi US State Deparment official chuan sawiin, fuel phurh luh tam ber chu chhawmdawlna thawk mekte tan a ni dawn a, hei bakah UN hnathawhna puihna atan hmangin, fuel tlakchham vanga mobile leh internet service tihtawp takte tihnunna atan hman a ni bawk ang, a ti.

Fuel phurh luhna tura inremna hi a hma daiha a thuphungin an lo siam tawh a, mahse a taka kalpui thuai turin US chuan a nawr a ni.