US First Lady hlui Rosalynn Carter a thi
US First Lady hlui Rosalynn Carter chu kum 96 mi niin an ram huna Pathianni khan a thi.
Rosalynn Carter hi a pasal, Jimmy Carter-a US President a nih lai khan a adviser ṭha tak a ni. Kum 1946 khan an innei a, an inneih hian Rosalynn hi kum 18 mi niin Jimmy hi kum 21 a ni. Kum 2015-a cable TV channel pakhatin a kawmnaah, Jimmy Carter chuan a thil tih ṭhat ber chu nupui atana Rosalynn neih a nih thu sawiin, a tan chuan a lungpui a ni tih a sawi. Fa pali an nei an ni.
Kum 2023, May thla khan Carter chhungkua chuan Rosalynn hian dementia a vei tih puangin, mahse hlim takin Plains, Georgia-ah an nupa inah a khawsa tih an sawi. A pasal Jimmy pawh hi kum 99 ni tawhin, February thla aṭang khan hospice care home-ah enkawl a ni a, Rosalynn pawh hi kar liam ta khan a pasal enkawlna hmunah hian dah a ni. Pathianni khan thlamuang takin a kal ta tiin an chhungkaw thuchhuah chuan an tarlang.