Yemen defence minister missile hmangin bei

Yemen defence minister Mohammed al-Maqdashi telna meeting chu Thawhlehni khan  ballistic missile hmanga beih a ni a, vanneihthlak takin a him hlauh niin sorkar security official-te chuan an sawi.

Mohammed al-Maqdashi hian Thawhlehni khan a ministry headquarter awmna Marib central province-a Sahn al-Jin camp-ah sipai hotu dangte nen meeting an nei a, an meeting lai hi missile hmangin an bei a ni. Sipai pasarih an thih bakah mi dang 10 an hliam bawk.

Security official-te chuan Houthi helte beih niin an sawi a, mahse Houthi lam hian thuchhuah engmah an la siam lo a ni.

Yemen hi kum 2014 aṭang khan civil war vangin an buai hle a, Iran kaihhruai Houthi helte chuan an ram hmar lam hmun tam tak an thunun a, ram dangin ram hruaitu atana an pawmpui president Abd-Rabbu Mansour Hadi pawh an ram khawpui Sanaa aṭangin an um chhuak hial. An ram buainaah hian thi pawh an tam tawk hle a, ṭamte pawh a tlak phah hial bawk.