China President-in an ram sipaite indo tura inralring turin a hriattir

China president Xi Jingping chuan an ram sipaite chu an ramin hun duhawm lo a tawn chu hrethiam a, ṭha tak training nei zel turin leh a ṭul huna indo tura inralring reng turin a hriattir.

Kum 66 mi Xi hi Communist Party of China (CPC) General Secretary a nih bakah, an ram sipai hotu lu ber a ni bawk. A dam chhung zawnga an ram hotu lu ber tur hian People's Liberation Army (PLA) leh People's Armed Police Force meeting-ah thusawiin, an ram dinhmun chu hria a, ṭha taka training nei a, indo inring reng turin a hriattir bakah an ram humhim turin an ram sipaite chu a chah bawk a ni. 

Tunhnai khan China leh India chu Sikkim hmar lamah leh Ladakh khawchhak lama awm India leh China inrina, Line of Actual Control (LAC)-ah an innghirngho a, LAC -a India leh China inrina chu kilometre 3,500 dawn a ni a, ramri chungchangah hian ṭum eng emaw zat an inhmu thiam lo fo a ni.

China chuan an ram chhung Galwan Valley region-ah India sipaite chu an lut niin a sawi a, hei vang hian China leh India inkarah hian buaina tenau a chhuak a, hetihlai hian India Ministry of External Affairs chuan dan pangngai angin Sikkim leh Ladakh-a LAC-ahte patrolling a neih thu a tarlang thung.   

 

Tunah hian Pacific tuipuia South China Sea-ah US leh China-te chu an innghirngho chho leh mek a, US navy-te chuan South China Sea leh Taiwan Straits huam chhungah hian patrolling an nei a, hei hi China hian a ngai thei lo hle a, ram pahnih inkarah hian boruak duhawm lo tak a inmung mek niin a lang.

US chuan China chu Covid-19 hri rawn chhuahna a nih thu  sawi foin he hri vanga khawvelin buaina a tawh mekah chuan China chu mawhphurtuah a puh a, hripui leng mek chu China siam niin a lo puh tawh bawk. China chuan thil thup a nei niin a ngai a, China chu langtlang lo taka thil tiah a puh fo a ni. 

Hengte avang hian US leh China inkar hi a chhe zual hle a, US hian WHO leh China chu ṭangrualah a puh a, an hmalaknate chu a ṭha tawk lo niin a sawi bawk. US-in a puhna avang hian Chinese State Councilor and Foreign Minister Wang Yi chuan US chu new Cold War chawk chhuak tur a nih thu a sawi hial.

May 22 khan China chuan a defence budget atan US dollar vaibelchhia 179 a dah a, hei hi nikuma a defence budget aiin 6%-in a tam zawk a ni. 

Kum 2012 aṭang khan Xi Jingping hian an ram lu ber nihna a chelh ṭana, lalna a chelh aṭang hian an ram humhimna tura sipai hmasawnna chu a ngaipawimawh hle a, US tih lohah chuan defence lama pawisa dah hnem ber a ni mek reng a ni. Tuna an sipaite inralring tura a ti leh hian khawvel ram hrang hrang beng a verh hle.