Israel-Hamas war : Inremna siam a hnai tawh : Hamas Leader

Gaza Strip-a rorel lai, Palestinian firfiak pawl, Hamas hruaitu Ismail Haniyeh chuan hun rei tak Gaza Strip-a indona a thlen hnuah, Hamas official-te chuan Israel chu inremna siampui tumin an dawr mek thu leh, inremna an siam hnai tawh thu a sawi.

Haniyeh chuan nimina thuchhuah a siamah he thu hi a sawi a, mahse, an hma lak mek dan erawh kimchangin a tarlang lo. Hetih lai hian Hamas official pakhat chuan Qatar palaina hnuaiah, inkahhai puan dan turte, Gaza-a chhawmdawlna thawn luh a nih dan tur leh, Hamas-te'n an mi hren mekte leh Israel ram tan ina Palestinian tang mekte inthleng dan turte chu an sawiho zingah a tel niin a tarlang.

Hetih lai hian Israel lam chuan Qatar kaihhruaina hnuaia an inbiak chungchangah thuchhuah siam a nei ve lo thung a, senior official chuan inremna an siam hnai tawh tih chauh a sawi.

Israel-in Hamas hmun 250 bei leh

Inkahhai puan dan ngaihtuaha inbiakna neih a nih mek karah, Israel chuan Gaza Strip-a Hamas hmun hrang hrang a la bei chhunzawm zel.

Israel Defence Force (IDF) chuan Thawhṭanni khan Gaza-a Hamas pawl hmun hrang hrang 250 chu thlawhtheihna hmangin an bei leh. Hamas ho hmun leh thil neih an kah chhiatsak zingah hian missile launcher pawh a tel. Hei bakah Pathiannia rocket hmanga Gush Dan (greater Tel Aviv area) beih a nih ṭuma rocket an kah chhuahna, rocket launching station pawh an kah chhiatsak bawk.

IDF-a Harel Brigade combat team chuan Gaza Strip-a in pakhatah ralthuam ṭhahnem tak an man a, 14th Brigade combat team chuan naute khum hnuaiah anti-tank missile thuhruk an hmu chhuak bawk a ni. Nimin zinga Gaza hmar lama inbeihnaah Israel sipai pahnih an thi a, sipai pathum leh reservist pahnihin hliam an tuar bawk niin IDF chuan a sawi.

Hamas-in an mi mante tunnel-ah an dah thu an sawi

Hamas firfiakte'n October 7-a Israel an beih ṭuma an mi man, an la kawl mekte chu Gaza Strip-a tunnel-ah an hreng mek a, an awmna hmun pawh a him niin an sawi.

Israel chuan Hamas mi hrente hi mi 240 vel niin an sawi a, an zingah hian naupang kum 10 hnuai lam 20 leh, kum 10-20 inkarh 60 vel an tel niin a sawi a ni. Hamas-te hian an mi man zinga pali chu an chhuah tawh a, pakhat chu Israel sipaite'n an chhanchhuak bawk. Hamas hian an mi hren zat chiah hi an sawi chiang lo a, mahse, an zinga ṭhenkhat chu Israel sipaite'n Gaza an beihnaa thi zingah an tel niin an lo sawi tawh a ni.