NKorea-in Nov 22 - Dec 1 inkarah satellite kah chhuah a tum

North Korea chuan November 22 - December 1 inkarah space satellite phurtu rocket kah chhuah a tum tih sawiin, Yellow Sea leh East China Sea lama kah chhuah a tum avangin Japan hnenah pawh a hriattir lawk. Hei hi kumin chhunga spy satellite kah chhuah a tum ṭum thumna tur a ni ang.

Kuminah North Korea hian spy satellite hi ṭum hnih kah chhuah a lo tum tawh a, mahse, a hlawhchham ve ve a ni. A hnuhnung zawk chu August thlaah khan niin, a hlawhchham leh hnuah scientist-te chuan beih nawn leh an tum thu an sawi a ni.

North Korea-in satellite kah chhuah a tum chungchang a hriattir hnuah, Japan Prime Minister office chuan US, South Korea leh ram dangte thawhpuiin, NKorea hnenah an thil tum hi kaltlangpui lo tura nawr an tum tih a sawi. Japan prime minister Fumio Kishida chuan, "An thil tum chu satellite kah chhuah pawh ni se, ballistic missile technology hman chu United Nations Security Council resolution palzutna a ni," tiin hei hian an ram security thlenga a nghawng theih tur thu a sawi.