Israel-Hamas war : Ni li chhung indo chawlh lailawk remti - Hamas mi hren 50 leh Palestinian tang 150 chhuah dawn

Israel leh Hamas-te chuan Gaza Strip-ah ni li chhung indo chawlh an remti a, hemi chhung hian an mi hrente an inchhuahsak tawn ang. Inremna an siam hi an hman ṭan hun tur an la puang lo thung.

October 7-a Hamas firfiakte'n Israel chhim lam bei a, mi tam tak an kah hlum leh an man avangin Israel hian Hamas rorel mekna, Gaza Strip hi a bei chhunzawm ve nghal a ni. Thla khat chuang fe indo tawhin, mi tam takin nunna an chan tawh a ni.

Ram leh pawl hrang hrangte'n inkahhai puang turin an nawr reng a, Qatar chuan inremna an siam theihna turin theihtawpin palai hna a thawk bawk. Hun rei tak inbiakna kalpui a nih hnuah, ni li chhung indo chawlh lailawkna tura inremna siam hi an remti thei ta.

Ni li indona chawlhsan a nih chhung hian Hamas chuan Israel an beih ṭuma an mi man, Gaza-a an hren mek mi 50-te chu a chhuah dawn a, Israel hian an ram tan in hrang hranga Palestinian tang mek zingah mi 150, tleirawl leh hmeichhiate chu a chhuah bawk ang. Ni li hnuah Hamas-te'n an mi hrente hi an chhuah belh leh chuan, Israel pawhin an ram tan ina Palestinian tang mekte chu an la chhuah chhunzawm zel thei dawn nia sawi a ni bawk.

Israel sorkar chuan nimin khan tang chhuahna tur rawtna siam hi sawiho a nih hnuah an pawm ta tih sawiin, prime minister Benjamin Netanyahu chuan thutlukna ṭha tak, mahse, siam harsa tak a nih thu a sawi. Sawihonaah hian eptu lam chuan indo chawlh lailawk hnuah sipaite tan beihpui thlak thar leh chu thil harsa tak a ni dawn a, hei bakah Israel-in Gaza aṭanga Hamas-te nuai chimit tura a hmalakna pawh a tibahlah thei dawn niin an sawi. Mahse PM Netanyahu chuan an hnialna hi chhangin, inremna an siamin a huam chin a zawh hunah, Israel Defence Force (IDF)-te chuan beihpui an thlak chhunzawm leh nghal dawn a ni, a ti. "Hei hi ka sawi duh, kan indo mek a ni, kan thil tumte kan puitlin hma chuan indona hi kan chhunzawm zel bawk ang. Kan thil tum chu Hamas te nuai chimih leh, an mi hren mekte hruai haw leh vek a ni," a ti. Inremna siam hi hman a la nih loh avangin, Israel sipaite hian nimin khan Gaza Strip chhim lam an la bei chhunzawm zel a ni.

Hamas-te'n Israel an beih ṭuma an man, an hren mek hi mi 200 chuang nia sawi a ni. An zinga a zahve dawn chu ram dang mi leh dual citizenship nei, ram 40 vela mi niin US, Thailand, Britain, France, Argentina, Germany, Chile, Spain leh Portugal mite pawh an tel tih Israel sorkar chuan a lo sawi tawh bawk. Indo chawlh chhung hian International Committee of the Red Cross aiawhte chuan Hamas-te'n an mi mante an hrenna hmun hi tlawhin, an mamawh leh damdawite an pe dawn tih Netanyahu chuan a sawi bawk.

Hetih lai hian Israel rama tan in hrang hrangah hian Palestinian tang hi mi 7,800 chuang an awm mek. Palestinian Authority hnuaia Commission for Prisoners' Affairs hotu, Quadura Fares chuan Israel tan ina tang zingah hian hmeichhia 85 leh kum tling lo 350 an awm niin a tarlang a, a tam zawk hi lung leh hmanraw dang hmanga Israel sipaite an beih vanga mante an ni, a ti.

Ram hrang hrangte chuan Israel leh Hamas-te'n indo chawlh lailawk tura inremna an siam thei ta chu lawmawm an tih thu an sawi. Indo an chawlh chhung hian indona tuartu, Gaza Strip-a civil mite tan pawh chhawmdawlna a tam thei ang thawn luh leh sem tum a ni bawk. Fuel pawh thawn luh a ni bawk ang.