Israel-Hamas war : Israel-in Al-Shifa Hospital director an man

Israel sipaite chuan Gaza City-a damdawi in lian ber, Al-Shifa Hospital director, Muhammad Abu Salmiya an man. Damdawi ina Palestinian paramedics pahnih pawh an man tel bawk a ni.

Hamas rorelna hnuaia awm mek, Gaza Strip-a health ministry chuan United Nations leh World Health Organisation (WHO) hnenah hosptial director chu chhuah tura Israel nawr turin a ngen. Health ministry thupuangtu, Ashraf Al Qudra chuan Muhammad Abu Salmiya leh medical mi leh sa ṭhenkhat man an ni chu an dem thu a sawi a, he hi mahni mihring puite laka pawikhawihna lian tak a ni tiin, chhuah an nih thuai theihna atana nawr turin ram leh pawl hrang hrangte an ngen tih a sawi.

Al-Shifa hospital hnuaia Hamas firfiakte'n command centre an neih thu Israel chuan a lo sawi tawh a, hei hi US pawhin a lo nemnghet tawh bawk. Israel sipaite chuan he damdawi in chhung hi luh chilhin, pindan hrang hrangte an enfiah bakah, mi ṭhenkhat chu thu an lo zawt fiah tawh a ni. Damdawi in chhung an endiknaa pindan ṭhenkhatah Hamas-te'n ralthuam an chhekna hmunte pawh an hmu chhuak a, hei bakah hospital hnuaia Hamas-te leiverh siam te pawh an hmu chhuak tawh bawk.

Qatar hmalakna hnuaiah Israel leh Hamas-te hian an mi mante inchhuah tawnsakna turin ni li chhung Gaza Strip-a indo chawl lailawk turin inremna an siam tawh a, mahse, vawiin aṭangin hman ṭan chauh a ni ang.

Lebanon aṭangin rocket hmangin Israel bei

Israel Defence Force (IDF) chuan nimin zing khan Lebanon aṭangin Israel hmar lam chu rocket 50 vela kah a ni leh tih an sawi. Lebanon ramri bul khaw hrang hrangah siren tihrik a ni.

Lebanon-a Iran thlawp firfiak pawl, Hezbollah chuan rocket hi an kah a ni tih an sawi a, ramri bula Israel sipaite hmunpui beihna atan Katyusha rocket 48 an kap chhuak tih an sawi. Hei bakah hian nimin zing vek khan anti-tank missile hmangin ṭum 11 vel IDF ho hmun an bei tih an sawi bawk.

Nilaini khan Israel-in indo thlawhtheihna hmanga Lebanon chhim lama Beit Yahoun a beihnaah Hezbollah member panga an thi a, an zingah hian Hezbollah MP Mohammad Raad fapa pawh a tel. MP chuan a fapa chu a martar a ni tiin, a lawmpui thu a sawi.