Netherlands inthlanah Islam dodaltu party-in seat la hnem ber

Netherlands Parliament inthlanah Islam dodaltu langsar tak, far-right populist, Geert Wilders kaihhruai, Party for Freedom (PVV) chuan party malin seat an la hnem ber.

Parliament seat 150 awmah, PVV hian seat 37 lain, party mala seat la hnem ber ni mah se, sorkarna an siam pha lo a, hei vang hian ṭangrual sorkar siampui turin party dangte an be mek.

Prime minister kal chhuak, Mark Rutte kaihhruai People's party for Freedom and Democracy (VVD) chuan seat 24 an la a, Labour/Green thawk dunin seat 25 an la bawk.

PVV hian party dang nena ṭangrual sorkar an siam thei dawn a nih chuan Geert Wilders hi prime minister a ni dawn a, hei hian Muslim ramte nena an inkar pawh a nghawng rin a ni a, an rama Muslim awmte pawhin an hlauthawng nghal hle. Catholic chhungkuaa seilian, Wilder hi langsar taka Islam sakhua sawichhia leh sawisel fo a ni a, Islam chu culture hnufum lutuk tia a sawi avangin sawisel a lo tawk nasa tawh hle. Quran sawiselna film, minute 17-a thui a siam 'Fitna' chu House of Lords-ah chhuah a tum avangin kum 2009 khan Heathrow International Airport-ah dan a lo ni tawh. Social media lam a hmang nasa a, a mimal ngaihdan pawh a tarlang fo a ni.