Israel-Hamas war : Ni 4 chhung indo chawlhsan tura inremna hmang ṭan

Israel leh Palestinian firfiak pawl, Hamas-te chu kar sarih an indo hnuah, Gaza Strip-ah ni li chhung indo chawlh lailawk tura inremna an siam chu an ram huna nimin zing dar 7 aṭang khan an hmang ṭan ta.

Qatar palaina hnuaia inremna an siam angin, Hamas-te chuan October 7-a Israel an beih ṭuma an mi mante zinga mi 13 chu nimin tlai khan an chhuah hman beisei a ni. Ni li chhung hian nitin chhuah belh zelin, mi 50 chhuah turin an inrem. Hemi chhung vek hian Israel lam pawhin an ram chhung jail hrang hranga Palestinian mi tang zinga mi 150-te an chhuah vekbawk ang. Israel-in Palestinian tang a chhuah turte hi hmeichhia leh tleirawlte an ni. Heng mite hi lung leh hmanraw dang lian tham vak lo hmanga Israel sipai an beih avanga mante an ni hlawm.

Hamas-in an mi hren an chhuah turte hi Red Cross leh Egypt security palaite kutah an hlan dawn a, anni hian Egypt ramri kaltlangin an hruai chhuak ang a, Israel kutah an pe dawn a ni.

Inremna hman ṭan a nih aṭangin, Israel tank-te pawh Gaza Strip aṭangin a insaseng rih a, nimin khan inbeihna thleng thawm hriat tur a awm lo. Hemi rual hian an inremna siam hi a zawh hunah, Israel chuan Hamas firfiakte nuai chimit tura beihpui an thlakna chu an chhunzawm leh nghal tur thu Israel prime minister Benjamin Netanyahu chuan a lo sawi lawk tawh a ni.

Indo chawlh lailawk a nih aṭangin, Egypt ramri kaltlangin Gaza Strip-ah chhawmdawlna phurtute an lut ve nghal bawk. Damdawi lam bakah, ei tur leh fuel-te phurh luh a ni. Egypt chuan ni li chhung hian nitin fuel litre 130,000 bakah, gas phurtu truck pali leh indona avanga harsatna tawk, mipuite chhawmdawlna phurtu truck 200 vel tirh luh ziah an tum tih a sawi.

October 7-a Hamas-ten Israel an beih avang khan Israel chuan Gaza Strip kalpawhnate a khar nghal vek a ni. Hei vang hian Gaza-a chengte hian ei leh in turte pawh an tlachham ṭan tawh nia sawi a ni a, chhawmdawlna thawn luh phalsak ni ṭhin mah se mipui mamawh a phuhru pha lo hle. Fuel an tlakchham avangin damdawi-in tam takin hna an thawk mumal theih lo tawh lo a ni.

Qatar chuan inremna siam hi bawhchhiat a nih lohna turin a vil zui reng dawn tih a sawi. Doha-ah operation room siamin Israel sipai leh Hamas-te pawh be pawpin, information an la khawm reng dawn a ni.

Israel leh Hamas hi kar sarih zet an indo tawh a, hemi chhung hian Gaza Strip-a cheng Palestinian mi 13,300 chuang leh, Israel mi 1,400 vel an thi tawh nia tarlan a ni. Hliam tuar ṭhahnem tak an awm bawk.