Israel-Hamas war : Hamas mi hren 26 leh Palestinian tang zinga 78 chhuah tawh

Israel leh Hamas-in ni li chhung atana indo chawlh lailawk tura inremna an siam chu hman hmek niin, inremna an siam angin an mi hrente an chhuah tawn.

Nimin thleng khan Hamas chuan October 7-a Israel an beih ṭuma an mi man, Gaza Strip-a an hren mek zingah mi 26 an chhuah tawh a, hetih lai hian Israel lam pawh an ram tan ina Palestinian tang zinga mi 78 an chhuah tawh bawk.

Israel leh Hamas-te'n inremna an siam hmanga tang an inchhuahtawn mek karah hian, Egypt sorkar leh Hamas-te'n a hrana inremna an siam hnuaiah, Hamas mi hren zinga Thailand mi 14 leh Filipino pakhat chu a hranin chhuah an ni bawk a ni.

Ni li chhung atana indo chawlh lailawk tura inremna an siam hi vawiin hi a tawpna ni tur a ni. Hamas-te'n an mi hrente chhuah belh zel an remtih chuan inremna hi pawhsei theih a ni dawn niin a hma khan sawi a ni a, eng angin nge an kalpui zel dawn erawh sawi chian a la awm lo.

Hamas-te'n an mi hren an chhuah zingah hian naupang kum 3 mi yahal Shoham leh kum 8 mi Nave Shoham te an tel. Heng naupangte hi an nu Adi Shoham leh an pi, Dr Shoshan Haran-te nen Hamas-te hian an chhuah a ni. Hetih lai hian naupangte pa erawh chu hren zingah a tel a, an pu chu Hamas-te'n Israel an beih ṭum khan an kah hlumsak a ni.

Nimin khan Gaza Strip-a chengte ṭanpuina tur phurtu truck 200 chu Gaza-ah an luh belh leh. An zinga ṭhenkhat hian Gaza hmar lam an pan ang. Gaza Strip-a truck luh turte hi Israel thuneitute chuan Egypt ramri bul, Nitzana crossing-ah an lo endik zel a ni. Indo chawlh chhung hian ei tur, in tur leh damdawi mamawh phurtu truck tam tham tak chu Gaza Strip-ah hian tirh luh an ni tawh.