Myanmar armed group-in China-Myanmar border crossing la

Myanmar-a armed group-te chuan October thla aṭang khan Myanmar sipaite lakah ngawrh takin beihpui an thlak chhunzawm zel. Nimin khan armed group pakhat chuan China nena an inkalpawhna, China-Myanmar border crossing chu sipaite kut aṭangin an la.

Armed group pathum intel khawmte chuan Myanmar hmar lam, Shan state-ah chet an la nasa hle a; military post leh khaw pawimawh ṭhenkhatte an la tawh a ni. He pawl intel khawm zinga pakhat, Myanmar National Democratic Alliance Army (MNDAA) chuan nimin zing khan Kyin San Kyawt border gate a la tih an sawi. Hi hi Muse district-a Mongko area-a awm a ni. Hei bakah an thawhpui pawl dang pahnih, Arakan Army (AA) leh Ta'ang National Liberation Army (TNLA) chuan kar liam ta Zirtawpni aṭanga beihpui an thlak hnuah border trade zone an la tawh tih an sawi bawk.

MNDAA hian Kyin San Kywat-a border trade zone-ah hian an pawl flag an zar tawh a ni. He border gate hi Covid-19 hri leng avanga hun eng emaw chen khar a nih hnuah kum 2022 khan hawn a ni leh a, Myanmar-China border kaltlanga an insumdawn tawnna kawnga hmun pawimawh a ni.

Myanmar sipai thupuangtu, Zaw Min Tun chuan kar liam ta khan border crossing bula truck 120 ding chu a kang tih sawiin, he thil thlengah hian armed group-te chu mawhphurtuah a puh.