Sierra Leone-in ram pumah curfew puang

Sierra Leone sorkar chuan ralthuam keng, tu tih hriat lohte'n an ram khawpuia sipai barrack bei a, sipaite ralthuam dahna hmun luhchilh an tum avangin ram pumah curfew a puang.

Information minister Chernor Bah chuan nimin khan thuchhuah siamin, "Pathianni zing hma takah khan mi tu tih hriat loh, silai kengte chuan Freetown-a Wilberforce barrack-a ralthuam dahna hmun chu luhchilh an tum a, mahse, sipaite'n an lo dang thei a ni," a ti. He thil thleng avang hian ram pumah curfew puan nghal a nih thu sawiin, mipuite pawh fimkhur tur leh pawn chhuak tam lo turin a chah.

Sipai barrack luhchilh tumte hi hriat an la ni lo a, hetih lai senior official pakhat chuan Freetown-a central prison aṭangin tang ṭhenkhat an tlanchhuak tih sawiin, heng mite hi an ni maithei niin a sawi. He tan in hi mi 324 tan theihna tura tih a nih laiin, kum 2019-a US state department report-ah chuan mi 2,000 chuang an tang niin a tarlang.

Kumin June thlaa President atana Julius Maada Bio thlan nawn a nih hnuah Sierra Leone ram chhung boruak hi a buai hle. Eptu pawl lian ber candidate chuan President inthlan result hi a pawm lo a ni.