Israel-Hamas war : Inremna pawtsei turin Israel leh Hamas an nawr; Israel PM Netanyahu-a'n Gaza-a an sipaite tlawh

Israel leh Hamas-te'n an mi hrente inthlengna tura ni li chhung indo chawlh lailawk an siam chu nimin kha a tawp ni a ni a, hetih lai hian ram hrang hrang hruaitute chuan an inremna siam hi pawtsei turin an nawr.

Egypt, Qatar leh United States chuan Israel leh Hamas-te chu an inremna hi pawtsei turin an nawr mek a, inbiakna pawh an neihpui a ni. Hetih lai hian Israel prime minister Benjamin Netanyahu chuan Hamas-te'n Israel an beih ṭuma an mi mante an chhuah belh zel chuan, mi 10 an chhuahah ni khat zelin indo chawlh lailawk hi pawhsei zel a ni ang, a ti. Mahse hemi chungchangah hian nimin thleng khan Hamas lam hian thutlukna an la siam lo nia hriat a ni.

UN agency for Palestinian refugee pawhin indo chawlh chu pawhsei ngei a ngai tih sawiin, indona avanga harsatna tawk, Gaza Strip-a cheng mipuite chu ṭanpui leh chhawmdawl an ngai hle tih a sawi.

Netanyahu-a'n Gaza-a Israel sipaite a tlawh

Israel prime minister Benjamin Netanyahu chuan indo chawlh lai, Pathianni khan Gaza Strip-a an ram siapite a tlawh.

PM Netanyahu chuan sipaite hnenah hian hnehna an chan hma chuan an bei chhunzawm zel dawn tih hrihin, 'Engmahin min dang dawn lo," a ti. Prime Minister chuan thla khat chuang Israel leh Hamas-te indo hnua Gaza Strip a tlawhna hmasa ber a ni a, national security adviser Tzachi Hanegbi, military secretary Maj. Gen. Avi Gil leh Israel military deputy chief of staff Maj. Gen. Amir Baram-te'n an zui a ni.

Israel sorkar chuan Prime Minister thlalak hi dah chhuakin; T-shirt, jeans leh khaki jacket inbelin, helmet a khum bawk. Commander-te nen tun hnaia Israel sipaite'n Gaza Strip-a leiverh an hmuh chhuah chhungah an awm.

HRW-in Gaza hospital beihna rocket kal sual vang niin a sawi

Human Rights Watch (HRW) chuan October 17-a Gaza-a Al-Ahli Arab Hospital kah a nih avanga mi tam takin nunna an chan phahna chu Palestinian lam rocket kah chhuah kal sual vanga thleng niin a sawi.

Palestinian leh Arab ramte chuan Al-Ahli hospital-a thil puak na tak thleng chu Israel-in indo thlawhtheihna hmanga a kah vang niin an lo puh tawh a, mahse, Israel chuan thu dik lo a nih thu leh, rocket kal sual vanga thleng niin a lo sawi tawh a ni. Hemi hnuah, Pathianni khan HRW chuan evidence an hmuh aṭangin, Gaza aṭanga rocket kah chhuah kal sual hian damdawi in hi a fuh ni ngeia a lan thu a rawn sawi chiang vel leh a ni.

Gaza health ministry chuan Al-Ahli Arab Hospital kah fuh a nih avang hian mi 471-in nunna an chan phah niin a lo tarlang tawh a, mahse, hei hi Israel chuan a pawm lo thung. US intelligence report pawhin thi zat hi mi 100-300 inkar vel niin a sawi.

Israel-ah Elon Musk a zin

Billionaire Elon Musk chu nimin khan Israel-ah a zin a, president Isaac Herzog leh prime minister Benjamin Netanyahu bakah, Hamas firfiakte'n Israel mi an hren mek chhungte ṭhenkhat hmuh a tum.

President Herzog office chuan Elon Musk nen an meeting-naah hian online-a Juda huatna thehdarh awm ṭhin do let chungchang a sawipui dawn tih a sawi. September thla khan PM Netanyahu nen California-ah an lo inhmu tawh bawk a, hemi ṭum hian Netanyahu chuan X lama Juda huatna thu thehdarh a nih chungchangah, mi tinin an duhzawng sawi tura zalenna an neihte venhimsak chunga, inhuatna lam hawi thehdarh ṭhin do let tura hma la turin a lo ngen tawh bawk.

Civil rights group chuan Musk hi X social media platform-a Juda huatna thehdarhna kawng hawngtuah a puh. Mahse Musk chuan Juda huatna lam hawi thehdarh duh lotu a nih thu leh, buaina leh inhuatna chawk chhuak thei lam hawi thehdarh dodaltu a ni tih a sawi.

London-ah Juda-te thlawpna lantir

Hamas firfiakte'n October 7-a Israel an beih avanga Israel-in Gaza Strip-a beihpui a thlak hnuah, Juda-te huatna leh thliarna lam hawi chetna a hluar nasa hle. Hei hi duh loin, Pathianni khan Juda-te thlawpna lantirin London-ah mi 50,000 chuangin kawng an zawh.

Kawng zawhte hian Juda-te thliar hran leh huatna thleng chu eng kawng maha an pawm theih loh thu leh, British Jews-te an thlawpna thu ziakte an keng a, ṭhenkhatin Hamas-te'n Israel mi an hren mekte thlalakte an keng bawk. Hamas-te chu an mi hrente chhuah vek tura an phut thu an sawi.

London Metropolitan police chuan October 1 - November 1 inkar khan Juda-te huatna lam hawi pawikhawihna thleng 554 zet report an dawng tih sawiin, hei hi kum hmasa lam aiin a let 10 zetin a tam.