Israel-Hamas war : Darkar 48 chhung inremna pawtsei

Israel leh Hamas-te'n ni li chhung atana indo chawlhsan lailawk tura inremna an siam chu Thawhṭanni khan a tawp a, mahse, an inremna hi darkar 48 (ni hnih) atan an pawtsei leh.

Ram hrang hrangte'n inremna pawtsei tura an nawr hnuah, palai hna thawktu Qatar chuan darkar 48 pawhsei hi an remtih thu a sawi a, nimin khan inremna hi hmang chhunzawmin an mi tangte pawh an chhuah belh leh a ni.

Israel chuan kar liam ta Zirtawpnia inremna a hman ṭan aṭangin, Hamas-te'n Israel leh ram dang mi an hren zinga mi 69 chu chhuah an ni tawh tih a sawi. Hamas-te'n an mi hren an chhuahte hi hmeichhia leh naupangte an ni. Israel sorkar chuan Hamas-in an mi hrente ni tin mi 10 zel an chhuah theih chuan inremna hi pawhsei zel a remti dawn tih a lo sawi tawh a ni.

Inremna an siam angin, Israel lam hian an ram tan in hrang hranga Palestinian tang zinga mi 150 an chhuah ve tawh bawk.

US chuan Hamas mi hrente chhuah kim an nih hma chuan inremna hi pawhsei zel a nih theihna turin a nawr zel dawn tih a sawi. US National Security Council thupuangtu, John F Kirby chuan Gaza-a Hamas-te'n an hren meke chu chhuah zalen an nih vek theihna tur chuan inremna pawhsei zel chu thil ṭha ber a ni tiin, inremna hi siam a nih zel theihna atan theihtawp an chhuah zel tur thu a sawi.

US secretary of state Antony Blinken pawhin tunkar hian Dubai-a COP28 climate summit hmang tura a kal pahin Israel leh West Bank tlawh kawi a tum. Blinken hian Gaza Strip-a chhawmdawlna thawn luh zel a pawimawhzia te, Hamas mi hren mekte chhuah vek a ṭulzia leh, Palestinian territory-a civil mite himna ngai pawihmawh a ṭul thute chu Israel leh West Bank-a Palestinian hotute a sawipui ang.

Gaza-a cheng 67% in Hamas duh lo

US-Palestinian researcher, Princeton's School of Public and International Affairs dean, Amaney Jamal chuan October 7-a Hamas-te'n Israel an beih hma lawk khan Gaza Strip-ah polling data siamin, Gaza-a cheng zinga 67% te chuan Hamas chu an duh lo tih an sawi.

Kum 2006-a Palestinian terrorities inthlana hnehna changtu, Hamas hi US leh EU chuan firfiak pawlah a lo puang tawh a, Gaza Strip-a cheng mi tam zawk pawhin eiruknaa inhnamhnawih nasa leh civil mite laka inluling lutukah an ngai a ni. Hamas-te'n Israel laka pawikhawihna nasa tak an thlen hma pawh khan, mi tam tak chuan an chunga rorel turin an ring ngam tawh lo a ni, a ti.