Judicial custody-ah Pakistan PM hlui Imran Khan dah

Pakistan accountability court chuan an ram prime minister hlui, Pakistan Tehreek-e-Insaf (PTI) party hotu Imran Khan chu eiruk thubuaiah ni 14 chhung judicial custody-ah a dah. Khan hi Rawalpindi-a Adiala jail-ah a tang mek a ni.

Islamabad Accountability Court judge Muhammad Bashir chuan nimin khan Adiala jail chhungah PM hlui Imran Khan laka Al-Qadir Trust eiruk thubuai siamsak chu a ngaihtuah. Anti-graft body, National Accountability Bureau (NAB) in Khan-a jail tan hun pawtsei tura a ngenna chu hnawlin, judicial custody-ah a dah.

Nimina thubuai ngaihtuahnaah hian Imran Khan bakah a nupui Bushra Bibi, a farnu pahnih Aleema Khanum leh Noreen Khanum-te pawh an awm. Pathianni khan cricketer-turned-politician Khan hi NAB team hian a thubuai kaihhnawihah hian darkar hnih chuang thu an lo zawt fiah tawh bawk.

Al-Qadir Trust case-a UK National Crime Agency-in Pakistan sumdawng lian pakhat hnen aṭanga a sum mansak, pound mtd 190 a thawn kaihhnawih thil a ni. He thil hi Imran Khan-a prime minister laia thleng niin, sum an dawn hi national treasury-ah chhung lut loin, he sumdawng lian hi Supreme Court-a thubuai a lo neih tawha Rs tld 450 chawi tura hremna pek chinfelna atan a hmantir a ni. Hemi avang hian he sumdawng hian Khan leh a nupui Bushra Bibi-te chu Punjab province-a Jhelum district-ah Al-Qadir University dinna tur ram, acre 57-a zau a pe let ve thung.

Prime Minister a nihna aṭanga paihthlak a nih hnuah Imran Khan hi thubuai eng emaw zat siamsak a ni tawh a, Toshakhana corruption case-ah thiam loh chantir a nih hnuin August 5 aṭang khan jail-ah dah a ni a, September thla khan Attock aṭangin Adiala jail-ah sawn a ni.